Statusi i gazetarit dhe krimi ne media

11 Maj 2016, 16:16, Aktualitet CNA

Dhuna ndaj gazetarit Eduart Ilnica dy ditë më parë nga presidenti i skuadrës së Kastriotit u dënua nga mbarë opinioni publik.

Vetë gazetari Ilnica rrëfeu ngjarjen. Ai u shpreh se ishte duke pirë kafe në afërsi të zogut të zi, por kur i është afruar makinës së tij është dhunuar nga disa persona, nga të cilët kishte identifikuar presidentin e Kastriotit Alban Vogli. Ky i fundit u arrestua, por personat e tjerë ende nuk janë identifikuar.

A mjafton vetëm solidarizimi ?

Shpesh herë, gazetarët janë bërë pre e dhunës dhe kërcënimeve vetëm sepse kanë raportuar një ngjarje, kanë thënë të vërtetën, apo kanë publikuar fakte që kanë cënuar interesa të disa personave. Ndoshta policia ka arritur të ndalojë ndonjëherë autorët e këtyre krimeve, por kaq nuk mjafton për të mbrojtur gazetarët.

Dhunimi i gazetarit Ilnica nxjerr në pah nevojën urgjente që gazetarët kanë për një status për mbrojtjen e tyre. Është koha që bota mediatike në Shqipëri të kuptojë që gazetaria nuk është vetëm në studio. Përkundrazi, informacioni i parë merret nga terreni, nga ku shkon në studio dhe më pas, të qetë nga cdo presion apo kërcënim, secili prej kolegëve është i lirë të shprehë mendimin e tij.

Ky konstatim është bërë edhe nga gazetari Arsen Rusta, i cili përmes një postimi në rrjetet sociale, shkruan se: Kush ka dyshime për vështirësinë e gazetarisë në terren le të dalë ta verifikojë, i vetmi vend ku gazetarët trajtohen si rracë e urryer se denoncojnë e publikojnë shkleje të pafundme nga politikanët e deri tek banditët.

Statusi i gazetarit duhet të shërbejë si një mandat mbrojtjeje për faktin se janë pjesa e shoqërisë më e ekspozuar përballë krimit, politikës së korruptuar dhe këta janë denoncuesit më të mëdhenj të gjithckaje gri apo të zezë që ndodh në shoqërinë shqiptare.

Janë gazetarët të cilët mbledhin informacione apo raporte të ndryshme për ti cuar në redaksitë e tyre dhe për të denoncuar. Ata kryejnë misionin e tyre, por janë përballë dy zjarreve. I pari është krimi në Shqipëri. I dyti janë botuesit. Këto dy zjarre përballë gazetarëve dhe misionit të tyre për të informuar publikun, iu rrezikojnë atyre shpesh jetën. Rasti i gazetarit Ilnica është ai që bëri bujë dhe që njihet nga opinioni publik, por askush nuk flet për mediat e servilave të djeshëm apo të sotëm të qeverisë, të cilat censurojnë informacionet apo i kanë kthyer faqet e tyre në posterat zyrtare për qeverinë. Kjo nuk ndodh në asnjë vend tjetër në botë, vetëm në Shqipëri. Një tjetër biznesmen dhe pronar mediash merr mandat imuniteti dhe e humb, por askush nuk thotë se si ja vonon rrogat gazetarëve

Një tjetër merr koncesion nga qeveria. Një botues tjetër ndryshon sipas interesit ligjin për arsimin e lartë dhe këta 4-5 kokrra janë zjarri i krimit mediatik në Shqipëri.

Këta janë klientët e qeverisë dhe nga këta së pari duhet mbrojtur vetë mediat. Gazetarët është e vështirë ti mbrojmë nga pronarët e tyre, por të paktën statusi nuk duhet t?iu mungojë sepse nuk janë në një betejë dhe të pambrojtur vetëm përballë krimit, por janë të pambrojtur nga pronarët e tyre, të cilët i censurojnë dhe i bllokojnë. Ndoshta janë i vetmi grup shoqëror që kanë kundër qeverinë, krimin, korrupsionin, por edhe ata që iu japin pagën sepse fatkeqësisht janë të lidhur me atë që denoncojnë gazetarët./citynews