Pse PD nuk duhet të heshtë për Ilir Metën

21 Janar 2016, 09:00, Aktualitet CNA

Nga Elvi Fundo/citynews

Javën e fundit janë publikuar disa materiale të cilat vërtetojnë një miqësi të ngushtë të biznesmenit Kastriot Ismailaj, akuzuar për aferën CEZ-DIA, për lidhjet e tij të forta me kreun aktual të kuvendit dhe kreun e LSI-së Ilir Meta.

E para është një sms, e cila u publikua nga gazetari Artan Hoxha në emisionin ?Opinion? të Blendi Fevziut në Tv Klan. E dyta është një video e publikuar në citynews. Tek e para flitet për një kërkesë me sms për 200 me patjetër. Video tregon një festë familjare të të afërmve të Ismailaj, ku Ilir Meta është në krye të tavolinës.

Për të dy rastet nuk ka asnjë prononcim nga PS dhe PD. E para nuk më shqetëson aspak, pasi është thjeshtë pjesë e të njëjtit trup nga ku ka dalë Ilir Meta, pas një konflikt me ish kreun e atëhershëm socialist, Fatos Nano. Ajo që është shqetësuese dhe më shumë se banale është heshtja e opozitës që bëhet e treta e heshtur e madhe.

Partia Demokratike humb për disa arsye nga heshtja e saj sepse edhe duke heshtur humb.

Së pari, PD duke heshtur në të dyja rastet i jep një armë në dorë mazhorancës për të theksuar nesër se kërkesa e saj për hetimin e CEZ nuk ishte e sinqertë, por thjeshtë një lojë politike e momentit. Pra PD megjithëse kërkoi hetim ndërkombëtar dhe bëri një lojë të fortë politike, në përfundim të debatit, në opinion publik ngelet palë me Ilir Metën ashtu si qeveria Rama.

Së dyti, Partia Demokratike duke heshtur dhe duke e lënë topin në fushën e mazhorancës, i tregon Ilir Metës se ajo mund të jetë komardarja e tij e shpëtimit në rast se hidhet nga anija e Edi Ramës. Edhe ky fakt në opinion publik tregon se PD nuk është ndarë nga qeverisja e korruptuar me Ilir Metën.

Së treti, duke mos e sulmuar Ilir Metën dhe duke i zgjatur agoninë marrëdhënies së tij me Ramën, Partia Demokratike mund të humbasë shumë nga strukturat e saj votuese që vijnë nga administrata shtetërore apo njerëz që punojnë në poste publike. Kjo për faktin se ata nuk e shikojnë opozitën dhe vetë PD-në si forcë qeverisëse e së nesërmes. Por shkojnë dhe gjejnë siguri dhe qetësi, qoftë edhe pa dashuri tek LSI-ja e Ilir Metës, çka rrudh më tej votat e PD.

Tre argumentet e përmendura më lartë tregojnë se PD hesht për të përfituar nga konflikti i Ramës me Metën, por në fakt kjo heshtje është një humbje për Partinë Demokratike. Humbje sepse në opinion publik dhe debatuesit, me veprimet apo mosveprimet politike të kohëve të fundit, po tregon se nuk është ndarë nga aleati i saj i korruptuar dhe i denoncuar botërisht. Tregon se qëllimi i saj nuk është një qeverisje më e mirë nesër, më e ndershme, por rëndësi paska vetëm që Ilir Meta të ikë nga Rama dhe të kthehet në krahët e Bashës. Së fundi argumenti i forcimit të pozitave të Ilir Metës me votues në administrata, pasi në opinion publik duket si kolona që mban qeverisjen në këmbë në cdo kohë, Partisë Demokratike i lë shumë pak hapësirë për tu ringritur fort.

PD nuk mund të luajë fatin e saj duke u sjellë si e dashuruar marrëzisht me Ilir Metën, dashuri e cila nuk do humbiste kurrë, në rast se ai do ta braktiste Edi Ramën. ?Tradhtia? në këtë rast do ti harrohej, ashtu siç ja harroi Rama tre vite më parë. PD nuk mund të marroset duke pritur që ti kthehet dashnorja e dikurshme, e cila fluturon sa në një krah edhe në krahun tjetër. Kjo pritje dhe sjellje si forcë e dytë politike nuk e bën kurrë Partinë Demokratike fituese. Ajo nuk mund të ngelet në pritje duke ngrohur shtratin për Ilir Metën. Duhet të luftojë përballë të dy fatkeqësive, siç i quan Basha dhe më shumë se dashuri për Metën apo intriga me Ramën, duhet të shkojë dhe të gjejë mbështetjen dhe dashurinë e zgjedhësve shqiptarë, duke u treguar qartazi se është ndarë nga Meta, duke u treguar qartazi se nuk do qeverisë bashkë me korrupsionin, duke u treguar qartazi se është ajo forca që e ndërton vendin. Vetëm kështu do të ketë një ringritje të Partisë Demokratike për të fituar besimin e saj tek zgjedhësit si një mundësi për tu rikthyer në pushtet. Në të kundërt nuk është çudi që të ngelet shumë shumë gjatë në pritje duke ngrohur shtratin por edhe duke u plevitosur nga i ftohti nga pritja e gjatë./citynews