E fundit!

21:27 Aktualitet

Çështja e aeroportit të Vlorës/ Gjykata e Tiranës "ngrin" situatën

Gjykata e Shkallës së Parë Tiranë ka vendosur të ngrijë si...

Shkrihen 36 degët e PS/ Rama largon Saimir Tahirin nga kreu i PS Tiranë

28 Tetor 2015, 07:34, Politikë CNA

Kryeministri Edi Rama shkrin 36 degët e Partisë Socialiste në 36 rrethet e vendit. Ky vendim largon automatikisht 36 kryetarët e degëve të Partisë Socialiste, disa prej të cilëve janë deputetë, ministra, drejtorë etj. Përmbysja e madhe vjen në kuadër të sfidës së zgjedhjeve të 2017, përshtatjes me ndarjen e re administrative-territoriale dhe vendimeve të Asamblesë Kombëtare të PS për reformimin e partisë. Të gjithë krerët e degëve të Partisë Socialiste në Shqipëri, për një periudhë tranzitore, janë zëvendësuar me gjashtë koordinatorët e gjashtë rajoneve, të cilët janë ngarkuar nga shefi i qeverisë për zbatimin e detyrave të lëna në mbledhjen e fundit të Asamblesë Kombëtare, duke nisur që nga zgjedhjet në strukturat e PS, analizën e rezultatit, ndryshimet statutore, shtimin e anëtarësisë etj.

Ndërkaq, të gjitha këto lëvizje kanë një arsye madhore, që lidhet me rezultatin në zgjedhjet lokale të 21 Qershorit. Dominimi i Partisë Socialiste në zgjedhjet e fundit lokale konsiderohet si një fitore e helmët dhe sinjal i fortë për zgjedhjet e ardhshme parlamentare. PS fitoi shumicën e bashkive dhe këshillave, për shkak të aleancës me LSI, por mori 300 mijë vota më pak se në zgjedhjet e 2013. Në këtë kuadër, Edi Rama ka vendosur t?i kthejë sytë nga strukturat e partisë, nga buron fitimi, mbajtja dhe riciklimi i pushtetit në Shqipëri. Ndaj dhe vendimi i parë parashikon kryetarë të degëve të PS me kohë të plotë dhe të përkushtuar maksimalisht, duke e bërë këtë detyrë të papajtueshme me asnjë funksion tjetër shtetëror. Kryetarët e rinj të degëve të Partisë Socialiste do të jenë me pagë dhe ndalohen të ushtrojnë çdo funksion tjetër. Pas shkrirjes së 36 degëve, Partia Socialiste pritet të strukturohet në 61 degë, të cilat përkojnë me 61 njësitë vendore.

Ikën Saimir Tahiri

Ministri i Brendshëm, Saimir Tahiri, nuk do të jetë më kryetar i Partisë Socialiste të Tiranës. Tahiri mund të garojë për këtë post vetëm nëse jep dorëheqjen nga funksioni i Ministrit të Brendshëm. Kryeministri Edi Rama, me anë të një vendimi të Asamblesë Kombëtare, ka zhveshur ministrin Tahiri nga të gjithë funksionet partiake. Ky vendim është përgjithësues, pra i shtrin efektet në të gjitha degët e PS, por posti i kreut të PS së Tiranës, sigurisht që është një pushtet i rëndësishëm që i hiqet ministrit Tahiri. Përpos ministrit Tahiri, nga drejtimi i degëve të Partisë Socialiste largohen edhe pesë deputetë socialistë. Po ashtu, largohen automatikisht të gjithë krerët e degëve aktuale, të cilët mbajnë poste drejtorësh apo pozicione të tjera në piramidën e administratës publike.

Koordinatorët

Gjashtë koordinatorët e Edi Ramës po krijojnë një hulli të re konflikti në Partisë Socialiste. Të gjitha takimet e Ditmir Bushatit dhe Lindita Nikollës, në Veri të vendit, janë karakterizuar nga debate dhe përplasje të forta. Shkaku është gjithnjë i njëjtë; Punësimet. Baza akuzon ministrat, drejtorët dhe deputetët për ndarje të padrejtë të pushtetit me aleatin kryesor si dhe për mbajtjen në punë të kamikazëve të PD. Nga ana tjetër, shfajësimet dhe alibitë e qendrës janë të njëjta. Ndërkaq, Koço Kokëdhia po humbet gradualisht kontrollin mbi strukturat e PS në Jug të vendit. Kokëdhima konsiderohet edhe si vetmitari i madh i këtij aksioni politik. Kokëdhima është bojkotuar në bllok nga të gjithë deputetët e Jugut të Vendit. Po ashtu, strukturat dhe drejtuesit e PS në nivel lokal kanë një alergji të pazakontë ndaj superdeputetit. Deputetët e Vlorës dhe Gjirokastrës janë në një armiqësi të heshtur me Koço Kokëdhimën. Dihet tashmë se, edhe raportet mes grupit parlamentar socialist dhe qeverisë janë problematike. Teksa kërkesat e tërthorta për ndryshimin e qeverisë bien në veshin e shurdhër, grupit parlamentar socialist pret me ankth rrëzimin e ndonjë ministri nga korrupsioni. Vetë kryeministri, publikisht flet vetëm për harmoni dhe fushë me lule, por në prapaskenë, deputetëve u kërkon të mos flasin keq për ministrat, ndërsa ministrave u dërgon letra kërcënuese.

Përplasja në PS

Në Partinë Socialiste ka pasur një përplasje mes linjave sa i takon rezultatit negativ në disa njësi vendore në zgjedhjet e 21 Qershorit 2015. Deputetët e Partisë Socialiste dhe krerët e partisë në rrethe, në raportet për humbjen, kanë identifikuar kandidatët e dobët dhe të pakonsultuar si një ndër arsyet e humbjes. Arsye të tjera kanë renditur braktisjen e bazës, mbajtjen e njerëzve të PD në punë, arrogancën e ministrave etj. Nga ana tjetër, kanë reaguar kandidatët, të cilët kanë akuzuar deputetët se nuk janë angazhuar maksimalisht në zgjedhje. Ndërkaq, nën akuzë për rezultatin e dobët në disa njësi janë vënë edhe drejtorët kryesor të PS. Ka pasur edhe nga ata që problemin e kanë parë tek LSI. /Sot