web counter
LEXO PA REKLAMA!

SHKARKO APP

App Store
Google Play

Ruçi jep alarmin/ Kemi vetëm 71 vota

22 Shtator 2015, 07:18, Aktualitet CNA

Mungesa e vazhdueshme e disa deputetëve në seancë plenare, arrestimi dhe përjashtimi i dy të tjerëve dhe mosmarrëveshjet brenda shumicës kanë dobësuar pozitat e mazhorancës në Parlament, në javën e parë të këtij sesioni parlamentar. Për herë të parë, që nga konstituimi i këtij Parlamenti, mazhoranca qeverisëse në seancën e kaluar plenare ra në 71 vota. Mazhoranca rrëzoi me 71 vota dy dekretet e Presidentit Bujar Nishani për arsimin dhe turizmin. Në këtë kuadër, mungesa e prezencës së deputetëve në seancë ishte dje sërish objekt debatesh dhe kritikash në mbledhjen e radhës së grupit parlamentar socialist.

Kreu i grupit parlamentar socialist, Gramoz Ruçi, i ka paralajmëruar deputetët socialistë se do merren masa politike. Është e disata herë që Ruçi kritikon deputetët për mungesat në seancat plenare, mungesë e cila ka bërë që të bjerë numri për votimin e projekteve në Kuvend. Në mbledhjen e djeshme, sipas burimeve, Ruçi është treguar tepër i ashpër me kolegët e tij, duke u shprehur se askush nuk duhet të braktisë votimin e projektligjeve, qoftë edhe kur kanë angazhime të tjera. Projektligjet do diskutohen në disa komisione parlamentare njëherësh dhe duhet të jenë gati për ditën e mërkurë, në seancë plenare.

Seanca e radhës nuk do të mbahet të enjten si zakonisht, pasi në këtë ditë do të festohet Kurban Bajrami. Urdhri i Ruçit, për të mos munguar në seancë, është i qartë dhe i prerë, pavarësisht se në mbledhjen e ardhshme nuk ka projektligje që kërkojnë shumicë të cilësuar. Dyshja Rama-Ruçi kërkojnë që deputetët e mazhorancës të jenë të gjithë në seancë, për të mbuluar vakancën që lanë pas 4 deputetët e larguar, dy prej të cilëve janë të arrestuar.





Lajmet e fundit nga