E fundit!

11:52 Aktualitet

Begaj në homazhet për efektivin e vrarë/ Familjarët i kërkojnë llogari: Po na vrisni, bëhuni të zotë

Presidenti Bajram Begaj ka marrë pjesë në homazhet në nder...

Brukseli ashpërson gjuhën: Gjyqtarët në Shqipëri kanë sjellje kriminale, prokurorët të korruptuar

10 Korrik 2015, 06:17, Aktualitet CNA

Një ditë pas mesazhit të qartë, të prerë dhe të drejtpërdrejtë të kancelares gjermane, Angela Merkel, Bashkimi Evropian ka ashpërsuar gjuhën në raport me drejtësinë shqiptare. Ambasadorja e Bashkimit Evropian në vendin tonë, Romana Vlahutin, ka deklaruar dje se gjyqtarët shqiptarë kanë sjellje kriminale, ndërsa prokurorët nuk hetojnë korrupsionin në këtë sistem. Ambasadorja tha gjithashtu se drejtësia shqiptare është një tallje e madhe me qytetarët e këtij vendi. ?Kjo reformë duhet të nënvizojë qartë dhe të ndajë prokurorët dhe gjyqtarët e ndershëm nga ata që kanë sjellje kriminale dhe që janë duke shfrytëzuar burimet publike dhe qytetarët. Kjo duhet të jetë një reformë e thellë dhe pa kompromis?, deklaroi Vlahutin.

Këto deklarata shefja e misionit të BE i bëri gjatë forumit të radhës të konsultimeve për reformën në drejtësi, i zhvilluar në Gjirokastër, ku ndër të tjera bëri thirrje për luftë të vazhdueshme ndaj këtij fenomeni. Sipas saj, duhet që gjyqtarët e korruptuar të ndiqen penalisht, duke i kërkuar në këtë mënyrë organit të akuzës të bëjë punën e vet. ?Është folur shumë për gjyqtarë të korruptuar, por shumë pak janë ndjekur penalisht. Mua nuk më pëlqejnë hamendësimet dhe thashethemet. Të jesh gjyqtar do të thotë të kesh një nga punët më me dinjitet në shoqëri dhe në fakt, kjo reformë duhet të mbrojë të gjithë ata që e bëjnë punën e tyre me ndershmëri e integritet?, ka vijuar Vlahutin. Ajo tha gjithashtu se një neglizhencë e tillë ndaj korrupsionit është absolutisht e pa pranueshme për qytetarët. ?Korrupsioni në gjyqësor është ndër më kritikët në shoqëri dhe i barazvlefshëm me talljen e qytetarëve të vendit?, tha ajo.

Pjesëmarrja e opozitës

Ambasadorja e Bashkimit Evropian, Romana Vlahutin, ka përshëndetur dje nga Gjirokastra vendimin e opozitës për t?u bërë pjesë e reformës në sistemin e drejtësisë. Ajo shprehu bindjen se ata do të japin kontributin e tyre. ?Dhe për këtë, unë jam shumë e kënaqur që anëtarët e opozitës janë bërë tani pjesë e këtij komisioni të posaçëm parlamentar, sepse reforma në drejtësi në Shqipëri duhet të qëndrojë mbi çdo interes tjetër, qoftë ky interes privat apo politik?, ka thënë Vlahutin. Teksa është ndalur tek dokumenti analitik i hartuar nga ekspertë të huaj dhe shqiptarë për korrupsionin në drejtësi, ajo është shprehur se ka nevojë për amendamente në Kushtetutë, ndërsa bashkëpunimin politik e cilësoi si shumë të rëndësishëm.

?Kjo nuk është një reformë politike, ajo udhëhiqet nga ekspertiza. Pra, nuk ka vend për negociata politike për angazhime nga më të ndryshmet apo për veto të caktuar, sepse nuk mund të ketë asgjë të tillë kur ne flasim për sundimin e ligjit dhe dhënien e drejtësisë?, ka vijuar Vlahutin. Ambasadorja e Bashkimit Evropian u ka bërë dhe një thirrje të qartë të gjithë aktorëve politikë, duke kërkuar që të mbajnë duart larg sistemit të drejtësisë. ?Është pikërisht cilësia dhe qartësia që do të bëjnë diferencën dhe do të lënë mënjanë çfarëdo vagullsie, ndaj puna e grupit tuaj të punës është tejet e rëndësishme?, ka shtuar ambasadorja. Aktiviteti i zhvilluar dje në Gjirokastër u mbajt në ambientet e universitetit “Eqrem Çabej”, ku ishin të ftuar gjyqtarë, prokurorë, avokatë, noterë, përmbarues, ndërmjetës, pedagogë, etj, për të dhënë mendimin dhe kontributin e tyre për një reformë cilësore./ Gazeta Sot