Spartak Ngjela: Basha hodhi PD në humnerë

9 Korrik 2015, 09:13, Aktualitet CNA

Avokat Spartak Ngjela ka komentuar situatën e Partisë Demokratike pas humbjes së zgjedhjeve lokale të 21 qershorit. Ngjela ka pohuar se PD sot është në krizë të rëndë drejtimi, duke shtuar se Basha e çoi partinë më të madhe të opozitës në humnerë. Avokat Ngjela jep alarmin se PD ka nevojë për ridrejtim, pasi me këtë përqindje votash që mori në 21 qershor, nuk do të vijë në pushtet për 15 vjet.

?Partia Demokratike ka nevojë për ridrejtim. PD ka qenë përballë kësaj fatkeqësie. Kjo parti është një makinë që Berisha e shkatërroi nga rrotat dhe frenat, ndërsa Basha është shofer që nuk di t?i japë makinës, të cilën e hodhi në humnerë! PD nuk ka drejtimin e duhur, dhe kjo është arsyeja pse e majta është forcuar. Demokracia është votë! Ku i kanë votat këta? Me këtë përqindje votash, PD nuk vjen për 15 vjet në pushte?, u shpreh Ngjela.

Avokat Ngjela pohon se PD nuk ka program dhe Basha është treguar infantil në politikë. Sipas tij, ky është defekti kryesor i PD, dhe për këtë arsye ka nevojë për ridrejtim. Ai sulmoi ish-kryeministrin Sali Berisha se nuk po e lejon PD që të ndryshojë sjellje politike dhe të ringrihet atje ku duhet të jetë. Ngjela tha se drejtimi i PD nga dyshja Berisha-Basha është energji e konsumuar kot, e cila nuk po e ndihmon të djathtën shqiptare të ringrihet, por po e çon drejt katastrofës.

?Cili është defekti i PD? Nuk ka program! U thirr që të merrte pjesë në tryezën për reformën territoriale, nuk mori pjesë. PD është amatore në politikë! U thirr për reformën në drejtësi, përsëri nuk mori pjesë. PD është infantile! Inati në politikë tregon karakter 12-13 vjeçar në moshë. PD duhet të ndryshojë karakter. Por, nuk i lë Saliu! Defiçenca intelektuale është refleksi i PD sot. Berisha ka vënë një njeri ta drejtojë, por ai nuk di ta drejtojë. Janë krijuar dy vija paralele që konsumojnë energji kot?, u shpreh Ngjela.

PD politizoi zgjedhjet

Avokat Spartak Ngjela ka pohuar se një tjetër arsye e humbjes së PD në 21 qershor është politizimi i zgjedhjeve lokale. Ngjela bën përgjegjës kryesor Lulzim Bashën, i cili sipas tij, nuk kishte program dhe u përpoq të politizonte procesin zgjedhor. Ai tha se Basha u tregua naiv dhe kjo i shkaktoi humbjen sërish PD. ?Basha u tregua naiv dhe donte ta politizonte procesin zgjedhor. Duke e politizuar, shqiptarët e goditën në 21 qershor. Basha nuk pranohet politikisht!”, deklaroi avokat Ngjela. Ditë më parë, avokat Ngjela është shprehur se nuk e sheh Bashën lider të PD për shumë kohë. “Kam përshtypjen se Basha nuk do jetë kryetar i PD deri në 2017.

Nëse Berisha do ta mbajë, do pësojë disfatë edhe më të thellë”, u shpreh ai, duke shtuar se Basha është një kryetar i katapultuar në politikën shqiptare. Ngjela e sheh në një krizë shumë të thellë PD dhe të djathtën shqiptare, ndërsa thekson se një lider i duhur që di të drejtojë, do të jetë e vetmja rrugë për ta nxjerrë këtë parti nga humnera ku ka rënë.