web counter
LEXO PA REKLAMA!

SHKARKO APP

App Store
Google Play

E fundit!

x

Bushati takon homologun spanjoll: Bashkëpunim në nivelin politik dhe atë ekonomiko-tregtar

22 Prill 2015, 13:43, Aktualitet CNA

Ministri i Punëve të Jashtme Ditmir Bushati zhvilloi një vizitë zyrtare në Mbretërinë e Spanjës, ku u takua me me homologun e tij Jose Manuel Garcia-Margello. Gjatë takimit me homologun e tij, dy Ministrat nënvizuan rëndësinë e rivitalizimit të marrëdhënieve mes dy vendeve, duke theksuar nevojën për ngritjen cilësore të këtij bashkëpunimi si në nivelin politik ashtu edhe në atë ekonomiko-tregtar.

Duke ndarë mendimin për interesin dhe potencialet që paraqet Shqipëria për investitorët  spanjollë, Ministri Bushati vuri në dukje se procesi i filluar me Konferencën e Berlinit vitin e kaluar përfaqëson një mundësi të mirë për pjesëmarrjen e  kompanive spanjolle në zbatimin e projekteve të përbashkëta infrastrukturore dhe energjetike ne rajon. Ministri Bushati e njohu bashkëbiseduesin me punën që qeveria shqiptare po bën në kuadër të përmbushjes së prioriteteve, me qëllim fillimin e negociatave për anëtarësim në BE.

Nga ana e tij Ministri García-Margallo vlerësoi progresin e Shqipërisë në rrugën e integrimit evropian duke theksuar se Spanja do të mbështesë Shqipërinë në këtë kuadër. Të dy ministrat duke iu referuar tragjedisë së fundit në Mesdhe, shprehën nevojën emergjente të rritjes së bashkëpunimit ndërkombëtar dhe trajtimit të shkaqeve të dramës së emigracionit ilegal në të gjitha forumet dhe të gjitha nivelet dy dhe shumëpalëshe, si dhe  mbështetjen e stabilitetit në vendet e origjinës.

Ministri Bushati kërkoi rishikimin e qëndrimit të Spanjës për njohjen e Kosovës dhe kërkoi mbështetjen e autoriteteve spanjolle për nënshkrimin e MSA-së me Kosovën, si dhe procesin e liberalizimit të vizave për qytetarët e saj. Të dy ministrat e jashtëm ndanë mendime të përbashkëta në lidhje me sfidat globale si lufta ndaj terrorizmit, fenomeni i luftëtarëve të huaj dhe situata në Ukrainë. Ata u angazhuan të rrisin kontaktet në organizma ndërkombëtarë si OKB-ja dhe agjencitë në varësi të saj, si dhe për një qasje më aktive të Shqipërisë në Bashkimin për Mesdheun dhe Aleancën e Qytetërimeve.





Lajmet e fundit nga