Pse Ilir Meta nuk ka Facebook dhe Twitter?

30 Mars 2015, 11:26, Politikë CNA

Rrjetet sociale, si Facebook dhe Twitter janë mediat sociale më të përhapura në botë dhe kohët e fundit në Shqipëri, pjesë të së cilave janë edhe politikanët shqiptarë. Emrat më të ndjekur në këto rrjete sociale janë kryeministri Edi Rama, ish kryeministri Sali Berisha, kreu i Partise Demokratike, Lulzim Basha, ministra, deputetë, persona aktiv në jetën politike shqiptare.

Secili prej tyre numëron mijëra ndjekës, ku listën e kryeson ish kryeministri Berisha me 960,880 persona, pas tij është kryeministri Edi Rama me 820,010 persona dhe Lulzim Basha me 508,686 ndjekës. Por, kreu i qeverisë është më aktiv me postime në Twitter.

Megjithatë, politikën në rrjetet sociale e mund humori , pasi aktori i njohur Ermal Mamaqi numëron rreth 1,614,559 ndjekës në Facebook. Politikanët kanë zgjedhur që përmes postimeve të jenë më pranë publikut, me statuse, komente, rreth ngjarjeve më të rëndësishme të ditës. Duke qënë se Facebook dhe Twitter janë media interaktive , politikanët kanë mundësi të marrin si feedback reagimet e publikut, përmes komenteve të tyre.

Por i vetmi politikanë që nuk ka një llogari në Twitter apo Facebook, është kreu i LSI-së dhe njëherësh, kreu i Kuvendit, Ilir Meta. Në një intervistë, ai është shprehur se nuk ka kohë të hap një llogari në rrjetet sociale dhe nuk dëshiron që të tjerët të merren me emrin e tij.

Të jetë vallë e vërtet që Ilir Meta është aq i angazhuar sa nuk ka kohë të merret me rrjetet sociale? A thua se Meta ka me shumë punë se vetë kryeministri Edi Rama, që merret me cdo detaj të punës së tij. Kaq shumë e ka të zënë kohën Meta sa nuk mund të shkruajë as edhe një mezazh në Twitter? Mundet LSI të braktisë mijëra njerëz që e mbështesin, duke mos i dhënë mundësi militanteve për interaktivitet.

Pse Ilir Meta nuk është pjesë e rrjeteve sociale? Sepse Meta mund të kontrollojë mediat por nuk mund të censurojë rrjetet socialedhe reagimet e qytetareve. Mos ndoshta Ilir Metën e pengon 21 janari, ka frike nga video e Dritan Priftit apo nga tradhëtitë e socialistëve, dhe më pas të demokratëve?

Kujtojmë se Meta është përplasur fort me Fatos Nanon dhe është rikthyer për të bashkëpunuar në qeverinë e vitit 2002; ka qenë kundërshtar i fortë i zotit Rama dhe është kthyer të bashkëqeveris me të, tani apo në koalicionin e 2007-ës; ka qenë një kundërshtar shumë i fortë i zotit Berisha, për një periudhë më shumë se nëntëmbëdhjetëvjeçare, dhe më pas është kthyer të qeveris me të, të gjitha këto dëshmojnë për një mungesë të theksuar morali politik, që e bën Metën të jetë jo pak realiste, duke shmangur përballjen me rrjetet sociale.