Ndryshime në Kodin e Punës, rriten pagesat për ditët e festave

13 Mars 2015, 16:42, Sociale CNA

Kodi i Punës do të pësojë ndryshime që pritet të sjellin rritjen e pagesave për punonjësit. Ekspertët e Ministrisë së Mirëqënies Sociale janë duke hartuar një projektligj të ri, që përmban ndryshime thelbësore në Kodin e Punës.

Burime të ?Shqiptarja.com? nga Ministria e Mirëqënies Sociale theksojnë se ndyshimet janë ende në fazën e diskutimeve, por mund të thuhet se për disa pika është rënë dakort. Më konkretisht do të propozohet rritja e pagesës për punën që do të kryhet gjatë ditëve të pushimit dhe ditëve të festave zyrtare.

Sipas kodit aktual të punës, ?puna e kryer ditën e pushimit javor kompensohet me një shtesë page jo më pak se 25%. Puna e kryer në ditët e festave zyrtare, kur kjo bie ditë pune, kompensohet me një shtesë mbi page jo më pak se 125 për qind?. Me propozimet që do të bëhen nga grupi i ekspertëve që po harton ndryshimet, këto pagesa do të rriten me 5-10%. Gjithashtu një pikë tjetër që prek punonjësit ka të bëjë me rastet e shkarkimit nga puna, ku tashmë do ti jepet më shumë të drejtë punëmmarësit.

Leja e lindjes
Me ndryshimet që do të bëhen në Kodin e Punës, favorizohen gratë që marrin leje lindje. Sipas burimeve nga Ministria e Mirëqënies Sociale gratë që punojnë 6 orë, për të llogaritur lejen e lindjes do të merren parasysh 8 orë pune në ditë. Kjo do të thotë që pagesa për lejen e lindjes të pësojë rritje të konsiderueshme. Por si jepet aktualisht leja e lindjes? ?E ardhura për barrëlindje i paguhet gruas së siguruar për barrën dhe lindjen e fëmijës, kur ajo ka 12 muaj periudhë sigurimi, për çdo rast përfitimi.

Përjashtohet nga rregulli për periudhën e sigurimit rasti kur e drejta e pagesës për barrëlindjen e radhës ndodh brenda 24 muajve nga data e lindjes së fëmijës së mëparshëm. Periudha e përfitimit është 365 ditë kalendarike, duke përfshirë një minimum prej 35 ditësh para dhe 63 ditësh pas lindjes së fëmijës. Për gruan që do të ketë në barrë më shumë se një fëmijë, periudha e përfitimit do të jetë 390 ditë kalendarike, duke përfshirë një minimum prej 60 ditë para dhe 63 ditë pas lindjes së fëmijëve?, – parashikon ligji për sigurimet shoqërore.

E ardhura për barrëlindje për gruan e siguruar është: 80 për qind e mesatares ditore të bazës së vlerësuar neto të dymbëdhjetë muajve të fundit nga data e lindjes të së drejtës për pagesë për periudhën e paralindjes dhe për 150 ditë kalendarike pas lindjes. 50 për qind e mesatares ditore të bazës së vlerësuar neto të dymbëdhjetë muajve të fundit nga data e lindjes së të drejtës për pagesë për periudhën tjetër në vazhdim. Projektligji parashikon një sërë ndryshimesh, të cilat pritet të rregullojnë problemet aktuale në tregun e punës. Pas diskutimeve të ekspertëve ndryshimet në Kodin e Punës pritet të çohen për miratim në Kuvend.

Ligji, Orët e punës dhe pushimet sipas kodit aktual të punës
Sipas Kodit të Punës punonjësit mund të kryejnë deri në 200 orë shtesë në vit. Në raste të veçanta, për një periudhe deri në katër muaj, mund të punohet me shumë se 48 orë në javë por koha mesatare javore e punës për këtë periudhë nuk duhet të jetë më shumë se 48 orë.

Kohëzgjatja e pushimeve vjetore është jo me pak se 28 ditë kalendarike gjatë vitit të punës në vazhdim. Ndalohet marrja në punë e të miturve nën moshën 16 vjeç. Ky ndalim nuk zbatohet për të miturit jo më pak se 15 vjeç gjatë pushimeve shkollore. Ndalohet puna për gratë shtatzëna gjatë 63 ditëve pas lindjes. Vlerësohetpushim kolektiv nga puna përfundimi i marrëdhënieve të punës nga punëdhënësi për arsye që nuk kanë të bëjnë me punëmarrësin, kur numri i pushimeve nga puna, brenda 90 ditëve, është të paktën 10 punëmarrës për ndërmarrjet me deri në 100 punonjës, 15 për ndërmarrjet me mbi 100 deri në 200 punonjës dhe 20 për ndërmarrjet me mbi 200 punonjës.