Të jesh i kënaqur!

22 Shkurt 2015, 09:00, Lifestyle CNA

Është në natyrën e njeriut që lumturinë ta shohë për një periudhë të ardhme. Beqarët mendojnë se do të jetojnë të lumtur pasi të martohen, të martuarit mendojnë se pasi të lindin fëmijë do të jenë të lumtur, prindërit mendojnë se pasi t?u rriten fëmijët do të jenë të lumtur, kur u rriten mendojnë se pasi të jenë martuar do të ndihen të lumtur, të punësuarit mendojnë se pasi të dalin në pension do të ndihen të lumtur e kështu me radhë.

Në fakt, lumturia është diçka që përjetohet në çast pa pritur të nesërmen. Lumturia është kur ti beson se jeta që bën është e lumtur, me të mirat dhe të këqijat e saj. Lumturia është nëse je i kënaqur me jetën tënde. A je i kënaqur me veten tënde? A je i kënaqur me gjendjen tënde? Është mirë të ëndërrosh për të nesërmen, por a je i kënaqur sot? Sa vend zë të qenët i kënaqur në jetën tënde? Një ndër shkaktarët kryesorë që njerëzit ndihen të vuajtur dhe jo të lumtur, është se ata nuk janë të kënaqur me atë që posedojnë.

Sot, as të varfërit nuk janë të kënaqur dhe as të pasurit, as ato gra që janë martuar dhe kanë lindur fëmijë nuk janë të kënaqura dhe as ato që janë privuar nga jeta familjare. As të papunët nuk ndihen të kënaqur dhe as të punësuarit. As ato vajza të cilave nuk u ka trokitur kush në derë nuk janë të kënaqura dhe as ato të cilat refuzojnë disa djem çdo ditë. As ata që e kanë punën afër banesës nuk janë të lumtur, as ata që përshkruajnë kilometra të tëra çdo ditë. As ata që jetojnë në vendin e tyre nuk janë të kënaqur, as ata që kanë emigruar për një jetë të mirë. As të sëmurët nuk janë të kënaqur, as të shëndetshmit nuk janë të kënaqur. A je i kënaqur me shtëpinë dhe banesën tënde? A je i kënaqur me jetesën që bën? A je i kënaqur me punën, specializimin dhe të ardhurat mujore? Ka njerëz, të cilët manifestojnë pakënaqësi edhe për pamjen fizike të tyre. Për këtë, hidhi një sy numrit të operacioneve plastike që bëhen çdo ditë në spitale.

Nuk mund të jetosh i lumtur në këtë botë, po nuk u ndjeve i kënaqur me ato që ke. Të qenurit i kënaqur është porta më e madhe e cila të çon te Krijuesi. Aty gjeni prehje dhe qetësi, aty është parajsa e kësaj bote.

Çfarë do të thotë të jesh i kënaqur?

Të jesh i kënaqur, do të thotë ta pranosh gjendjen që je sot dhe të kesh ambicie për ditën e nesërme. Të jesh i kënaqur është për të sotmen, ndërkohë që ambiciet janë për të nesërmen.

Ambiciet e mia për të nesërmen, nuk kanë përse të ndikojnë në kënaqësinë e ditës së sotme.

Një peshkatar, siguron jetesën me një varkë të vogël, me të cilën gjuan peshk çdo ditë. Edhe pse ai ëndërron një varkë më moderne dhe më të madhe, është i kënaqur me atë që ka dhe kujdeset çdo ditë për mirëmbajtjen e saj. Një familje ka një shtëpi të vogël dhe punon që të sigurojë një tjetër më të madhe.

Megjithatë, ata janë të kënaqur me shtëpinë që kanë dhe e mirëmbajnë atë.

Njeriu që është i kënaqur me atë që ka, jep rendimente më të larta se një tjetër në të njëjtin nivel shoqërorë.

Të qenurit i kënaqur, të pajis me energji dhe fuqi të pazakonta, për të realizuar ambiciet e tua.

Të kënaqurit apo durimi?

Çfarë ishte më e vlefshme të kënaqurit apo durimi? Është të kënaqurit. Kjo, sepse durimi shoqërohet me pezmatim dhe hi-dhërim, ndërkohë që kjo nuk ndodh me të kënaqurit.

Në udhë të drejtë?

Pa një vullnet të fortë, njeriu nuk mund të ndihet i lumtur, edhe pse mund të ketë zemër të pastër nga urrejtja dhe mllefi, të jetë i dashur me të tjerët dhe zemërgjerë. Që të kesh sukses në këtë botë, duhet të kesh vullnet të çeliktë. Që të kesh sukses në raportet me Krijuesin, duhet të kesh vullnet të hekurt.

Lumturia përbëhet nga 3 pjesë, ajo racionale, materiale dhe psiqike.

Që t?i garantosh vetes lumturinë maksimale në këtë botë, duhet të kesh lidhje të forta me Krijuesin, duhet të ndjekësh udhën e tij të drejtë.

Gjatë jetës së tij, njeriu shpeshherë gjendet në kryqëzime të shumta.

Rrugët që i dalin përpara, janë të gjata dhe plot pusi e gremina.

Vetëm njëra prej tyre është e drejtë dhe e çon në destinacionin e kërkuar. ?Prandaj qëndro i patundur në udhën e drejtë?.