Kulla dhe zhdukkja e shesheve në Korcë

26 Dhjetor 2014, 07:53, Aktualitet CNA

Nga ELTON DONO

KORÇË ? Sheshi para teatrit ?Andon Zako Çajupi? në qytetin e Korçës tashmë mund të cilësohet me plot gojën një ish-shesh. Projekti më i fundit i zbatuar në një sipërfaqe totale prej 9 000 metrash katrorë, i ka dhënë atij një pamje krejt tjetër, nëpërmjet një investimi që kap shifrën e 2.3 milionë eurove.

Objekti qëndror i ndërtuar është Kulla Panoramike, e ashtuquajtura ?Red Toëer? ose Kulla e Kuqe, e lartë 33m vendosur në qendër të sheshit.

Bashkangjitur, pista e patinazhit në akull e me patina në verë, një ekran dhe një orë dixhitale si dhe një perde e gjelbër me pemë të larta përreth kësaj zone.

Investimi është zgjatur edhe në hapësirat përreth sheshit. Në fillesat e tij, ky projekt i ndërtuar nga arkitekti Peter Ëillson hasi në debate të shumta të specialistëve vendas të kësaj fushe, si dhe të qytetarëve kryesisht në rrjetet sociale. Por përpos kritikave e sugjerimeve të shumta, ai tashmë është bërë realitet.

Në relacionin e parapërgatitur për këtë projekt ndërhyrja në këtë zonë cilësohej e domosdoshme për shkak të mangësive të theksuara funksionale e pamore. Pa llogaritur këtu kaosin e mjeteve dhe këmbësorëve që krijohej. Me projektin e ri të zbatuar janë shtuar hapësirat për këmbësorët, e janë ngushtuar ato për automjetet, edhe pse në relacionin final kjo cilësohet si ?disiplinim i lëvizjes së automjeteve, dhe siguri për këmbësorët?.

Trafiku që i ka pasuar zbatimit final të këtij projekti është dukuria më negative e tij, edhe pse në fazën e parë të maketit, i mëshohet disiplinimit të lëvizjes së automjeteve. Por pyetja që shtrohet është nëse ishte ky plani më i mirë i mundshëm në kushtet e problemeve të skajshme ekonomike me të cilat përballet Korça?

Pak kohë para përfundimit të zbatimit të projektit, projektuesi Peter Wilson (në foto duke inspektuar punimet) tha se duhet të pritet deri në përfundim të zbatimit në mënyrë që të flitet me baza për këtë projekt dhe rëndësinë e tij.

Wilson tha: ?Ky, si një projekt i ri, sigurisht që do të surprizojë dhe do të ngjallë reagime mëse normale. Këshilla ime është të pritet deri sa të realizohet e më pas unë pres miqësisht të gjitha vërejtjet, kritikat apo edhe komplimentat. Nëse ngjiteni sipër në kullë do të shihni se sa e sheshtë është Korça, në ndryshim nga perceptimi i deri më sotëm për këtë qytet kaq të bukur. Në shumicën e qyteteve në botë, kryesisht ato europiane ku do të veçoja Italinë, në afërsi të qendrave ndodhet një kullë e tillë, në këtë format. Logjika e ndërtimit të saj ka qenë pikërisht kjo. Nëse e vini re, kjo përkufizon aksin kryesor që është nga Katedralja përgjatë pedonales deri te kulla.?

Objekti më i debatuar i këtij projekti prej 2 miliardë e gjysmë lekësh ka qenë pikërisht kulla panoramike 33 m e lartë. Në lartësinë e saj vizitorët mund të ngjiten me shkallë ose me ashensor, e që prej andej mund të vëzhgojnë nga të gjitha anët qytetin juglindor, në një pamje krejt tjetër. Kulla ka një pamje ndryshe ditën dhe natën me ndriçimin anësor të pasqyruar përmes dritareve përgjatë kateve.

Deri më sot kulla është komentuar së shumti në rrjetet sociale ku flitet për Korçën, madje 4 muajt e fundit pothuajse janë harruar të gjitha problemet e tjera, e vëmendjen e ka marrë ndërtesa 33-metroshe mes qytetit.

Reagimet nuk kanë munguar as nga politika. Kryeministri Rama dha komentin e tij për të, ndërkohë që ish-Presidenti Topi e cilësoi një shëmtirë mes qytetit.

Pavarësisht polemikave e diskutimeve, tashmë ky projekt është bërë realitet. Ajo që mbetet për t?u theksuar, përpos vlerave që mund të përfaqësojë projekti, e kundërshtimeve ndaj tij që shpesh kanë qenë edhe politike, është humbja e sheshit të fundit të Korçës. Tashmë qyteti i serenatave nuk ka më një shesh.