web counter
LEXO PA REKLAMA!

SHKARKO APP

App Store
Google Play

E fundit!

x

Kaos me pensionet

25 Dhjetor 2014, 08:53, Aktualitet CNA

Vazhdon persekutimi moral dhe financiar i pensionistëve. Vonesa në shërbimin e ISSH lë në pritje qindra pensionistë. Të moshuarit e kryeqytetit vazhdojnë të përballen me radhë të gjata sa herë duan të pyesin apo dorëzojnë dokumente për pensionin e tyre, të apelojnë, të sqarohen etj. Ndonëse në vazhdimësi është bërë zhurmë e madhe për shërbimin e sporteleve, çdo pensionist, përballet si më parë me radhët e gjata.

Që në orët e para të mëngjesit, konstatohet një kaos në shërbimin e ISSH, pasi me dhjetëra pensionistë presin pranë sporteleve dhe që nga larg duket se diçka nuk shkon. Një pjesë e të moshuarve, në pamundësi për ta përballuar fizikisht radhën dhe pritjen për disa orë, ishin ulur nëpër kartonë përreth zyrës, ndërsa të tjerët mbështeteshin në muret anësore të objektit. Kohë më parë, për shkak të radhëve të gjata nuk kanë munguar rastet, ku të moshuarit kanë humbur jetën duke pritur në radhët e gjata.

Shkaku themelor për vonesat dhe radhët e gjatë të të moshuarve pranë këtyre sporteleve, dihet nga të gjithë se është cilësia e dobët e shërbimit që ofrojnë zyrat. Të moshuarit pensionistë të kryeqytetit, si kategoria më e pambrojtur e shoqërisë, shprehen se përballen çdo ditë me këtë situatë dhe nuk kanë munguar rastet që në pamundësi për ta përballuar pritjen dhe radhën, janë kthyer në shtëpi pa zgjidhur punë, për të ardhur sërish të nesërmen. Pensionistët i bëjnë thirrje ministrit të Mirëqenies, Çështjeve Sociale dhe Punës të marrë masa në përmirësimin e situatës dhe t?i gjendet pranë kësaj shtrese sa më parë.

Tallja

Dje ishte dita e pensioneve suplementare të ushtarakëve. Kaosi vazhdonte si çdo herë. Punonjësit e rinj të administratës me sa duket ende nuk e dinë arsyen se përse gjenden në ato zyra. Vetë të moshuarit që vijnë pranë ISSH për t?u interesuar për pensionet, deklarojnë se askush nuk u jep një informacion të saktë se si duhet të veprojnë. Madje, ata shprehen se u duhet të përballen me burokracitë në këto institucione dhe sorollatjen sa në një vend në tjetrin. ?Kam aplikuar deri në vitin 2009 për pension dhe e kam fituar të drejtën. Ende nuk kam marrë asgjë, megjithëse më takon me ligj dhe i kam plotësuar kriteret. Kam 20 vjet punë në policinë ushtarake. Në fillim na kërkuan dokumente punësimi nga privati, për kohën që kemi punuar aty. Këtu nuk të japin asnjë informacion se si duhet të veprojmë. Mjaftohen që afishojnë listat me dokumente që duhen dhe na thonë që nuk ju ndihmojmë dot më shumë?, thotë Isufi, një ish-ushtarak në pension. Më tej ai shtoj se, kërkesat e punonjësve arrijnë deri në absurditet, ku kërkojnë vërtetim nga komandanti ku kanë punuar, ndërkohë që komandanti ka vite që nuk jeton më.

?Shumë pak e kanë marrë pensionin, dhe ata që e kanë marrë kanë marrë minimumin e tij. Megjithëse në ligj është e përcaktuar që kush plotëson kriteret merr maksimumin e tij?, shton më tej Isufi. Ndërkaq, të tjerë pensionistë shprehen se punonjësit e Institutit të Sigurimeve Shoqërore iu kërkojnë herë pas here të njëjtat dokumente, madje çdo fundvit ata duhet t?i paraqesin këto dokumente të gjitha bashkë.

Një tjetër zonjë, ish-ushtarake tregon për ?SOT? se ndihet e mashtruar dhe e tallur, pasi iu është premtuar që femrat do kenë lehtësira, mirëpo asgjë nuk ka ndryshuar. ?Na premtuan lehtësira në dokumentacion për femrat. Na u tha që nuk duhet trungu familjar. Tani më duhet të shkoj në Tepelenë për të marrë një certifikatë?, tha ajo. Është paradoks mungesa e transparencës nga organet e Sigurimeve Shoqërore, që, edhe në rastet kur një ushtaraku i duhen dokumentet për ta ndjekur të drejtën e tij në rrugë gjyqësore, të mos i jepet dokumenti i llogaritjes së pensionit të tij, metodika e llogaritjes së pensionit, por, apriori, i regjistrohet vetëm masa e pensionit të cunguar në librezën e pensionit dhe, në mjaft raste, nuk i jepet as paga referuese mbi të cilën është llogaritur ose duhet të llogaritet pensioni.

Gazeta SOT





Lajmet e fundit nga