E fundit!

07:28 Aktualitet

Shteti duhet të paguajë 180 milionë euro për arbitrazhet ndërkombëtare

Detyrimet që lidhen me vendimet e arbitrazheve ndërkombëta...

Cila PD do hyjë në zgjedhje?

9 Gusht 2014, 19:11, Politikë CNA

Nga Mero Baze

Opsioni që PD të mos marrë pjesë në zgjedhjet vendore, ishte opsion kryesor i Lulzim Bashës gjashtë muaj më parë, kur shumica shpalli nisjen e reformës administrative. Duke mos pranuar të marrë pjesë në të, Basha në të vërtetë ishte duke kërkuar një arsye rezervë për bojkot të zgjedhjeve për të mos verfikuar pafuqinë e tij elekotrale.

Por, në kohën që e bëri këtë, situata në PD ishte krejt ndryshe. Lidershipi i vjetër ishte armiqësor me të, dhe partia ndjehej e coptuar pas teatrit që u luajt me garën Basha- Olldashi. Vetë Basha ishte i tëri nën ndikimin e çdo tingulli të Berishës dhe disa herë ishte bërë i paqenë prej tij dhe në Kuvend.

Në ato kushte, Basha kishte nevojë doemos për një arsye rezervë për t?i ikur ballafaqimit elektoral.

Por, gjashtë muaj më vonë situata është ndryshe. Basha ka ripërtërirë 53 kryetarë të degëve të PD-së, të cilët edhe pse nuk janë të gjithë ata që ai ka dashur, janë të gjithë ata që do ta duan. Në këtë mënyrë, ai ka një lidership të ri, që do t?i shkojë atij pas.

Nga ana tjetër, ndikimi i Berishës mbi të zgjedhurit e rinj është i dobët. Shumë prej tyre mundën kandidaturat që Berisha mbështeti hapur dhe nuk kanë komplekse ta kundërshtojnë, ose injorojnë atë. I dobësuar në bazë dhe në garniturën e re politike të PD, Berisha po angazhohet familjarisht me fëmijë, dhëndër, e mbesa, në debatin politik të PD, për të dëshmuar se ai kërkon tashmë hisen e tij në PD. Ai do të tentojë të përdorë ndarjen administrative, si një kartë politike për të radikalizuar situatën dhe për ta shtyrë PD jashtë zgjedhjeve. Por, në këtë moment ai nuk është i sigurtë sa mbështetje do të ketë dhe vetëm sa e paralajmëron atë.

Lufta e tij e ftohtë me Bashën do të zhvillohet pikërisht tek qëndrimi ndaj pjesmarrjes në zgjedhje. Berisha do ta tundë fort këtë kartë, me shpresë se do ta shtyjë Bashën jashtë, por nuk është i sigurtë nëse PD është e gatshme për këtë hap.

Është dhe një grupim i tretë në PD, ata që nuk janë as me ekipin e ri të Bashës dhe as me Berishën, të cilët janë po ashtu të gatshëm ta përdorin këtë kartë për të goditur Bashën, në sensin e kundërt. Nëse Basha nuk hyn në zgjedhje, ata do t?u bëjnë thirrje njerëzve të tyre në PD të futen në zgjedhje dhe të legalizojnë fraksionin e tyre brenda PD.

I vetmi i fituar nga gjithë kjo histori është Basha. Ai më shumë se sa për hyrje ose jo në zgjedhje, është i interesuar për një alibi të humbjes së PD në këto zgjedhje. Siç po shkon situata në PD, ai po e siguron paradhënie këtë alibi. Ai do ta çojë PD-në me mëdyshje deri ditën e fundit për ta lëkundur mes thirrjeve të Berishës dhe dëshirës së njerëzve të vet për të kandiduar dhe në fund mund të hyjë, edhe pse do të humbasë. Alibinë e ka të sigurtë, pasi një pjesë e PD, sipas tij, do të bojkotojë zgjedhjet. Qëllimi i tij final është të ketë një alibi për humbjen dhe jo vetëm të ketë disa kryetarë bashkie. Me qëndrimin e tij dhe përfshirjen paralele në orientimin e politikave të PD, Berisha po ja lehtëson Bashës alibinë për humbjen e zgjedhjeve, dhe po ashtu pjesmarrjen në zgjedhje.

Basha ishte partizan i bojkotit, kur PD i kishte ngelur në dorë si një trashëgimi nga Berisha dhe nuk dinte ç?të bënte me të. Tani PD është e Bashës, por Berisha do të diktojë qëndrimet e saj. Kjo ja lehtëson Bashës arsyetimin e humbjes, dhe ndoshta dhe arsyetimin e një konflikti të mundshëm me Berishën. Sot PD nuk është e bashkuar dhe në raport me pjesmarrjen në zgjedhje janë tre PD, është ajo e Bashës, ajo e Berishës dhe e të tjerëve. Të treja po përgjojnë ç?duhet bërë me zgjedhjet.

Basha ka dy rrugë, ose të bëhet bllok me Berishën dhe qëndrimet e tij, kundër zgjedhjeve dhe kundër kritikëve të tij në PD , ose të bashkohet me kritikët e tij në PD, të hyjë në zgjedhje dhe kësisoj të hyj në konflikt me Berishën, duke ja faturuar atij humbjen. Në të dy rastet, e ka alibinë për të qëndruar kryetar pas humbjes. Dhe duket se nuk kërkon më shumë se kaq.