web counter
LEXO PA REKLAMA!

SHKARKO APP

App Store
Google Play

Vllaznia-Kukësi, 4-3/ Kapiteni Balaj: Tani kemi fokus ndaj Egnatias

13 Gusht 2025, 14:55, Sport CNA

Vllaznia-Kukësi, 4-3/ Kapiteni Balaj: Tani kemi fokus ndaj Egnatias

Vllaznia zhvilloi një ndeshje miqësore përballë Kukësit teksa shkodranët fituan 4-3 këtë sfidë që ishte një lloj testi përpara nisjes së kampionatit shqiptar të futbollit. Pas ndeshjes, kapiteni i kuqebluve, Bekim Balaj, tha se shija e keqe e eliminimit drastik nga Konference League ka mbetur ende, por lojtarët tashmë po mundohen ta kalojnë atë moment për t’u përqendruar te ndeshja e parë e sezonit përballë kampionëve të Egnatias.

“Në prag të fillimit të kampionatit këto ndeshje janë të rëndësishme, sidomos për lojtarët që kanë ardhur që të marrin minuta e të kalojnë kohë me skuadrën. Mendoj që luajtëm mirë, edhe pse duhet të jemi më të kujdesshem në moslejimin e pësimit të golave. Është një test që na shërben përpara fillimit të kampionatit. Ka entuziazëm, ka dëshirë edhe konkurrenca është rritur. Fokusi për momentin është ndaj Egnatias, edhe pse kemi më parë me Besën e Kavajës”,-tha Balaj.

Nga ana tjetër, trajneri i Kukësit, Sadat Pajaziti, tha se do të kërkojë fitoren në çdo ndeshje në Kategorinë e Parë duke e ditur se dalja në Abissnet Superiore mbetet e vështirë.

“Paraqitja ishte e mirë sepse luajtëm kundër një Vllaznie që ka lojtarë cilësorë sepse vijnë nga Kupat e Europës dhe e kanë ritmin e lojës shumë më të shpejtë. Por me ekipin tim jam i kënaqur sepse jemi duke e ndërtuar një filozofi të lojës dhe ajo që është e rëndësishme është vullneti e gatishmëria për t'u përmirësuar. Ne po përgatitemi që të fitojmë çdo ndeshje, edhe pse kampionati mund të na çojë shumë larg sepse ka ekipe të mira, por me besimin do të jemi lart”,-tha Pajaziti.  

Në miqësoren mes Vllaznisë dhe Kukësit pati një shkëputje të energjisë elektrike në stadiumin “Loro Boriçi” në minutën e 84, gjë e cila ndërpreu ndeshjen për disa minuta derisa energjia u rikthye dhe ndeshja rinisi normalisht duke përfunduar 4-3 për kuqeblutë./CNA





Lajmet e fundit nga