E fundit!

07:28 Aktualitet

Shteti duhet të paguajë 180 milionë euro për arbitrazhet ndërkombëtare

Detyrimet që lidhen me vendimet e arbitrazheve ndërkombëta...

Veselinoviç: Skënderbeu ekip shumë i mirë, çdo pikë është flori

29 Tetor 2024, 14:14, Sport CNA

Veselinoviç: Skënderbeu ekip shumë i mirë, çdo

Trajneri i Partizanit, Aleksandër Veselinoviç, nuk i kurseu superlativat për Skënderbeun, skuadër me të cilën do të përballen këtë të mërkurë.

Në konferencën para mediave, tekniku i të kuqve, deklaroi se do të jetë një ndeshje e bukur dhe e luftuar. Sipas tij, korçarët bënë shumë mirë në sfidën e fundit ndaj Elbasanit, ku u afruan me fitoren edhe pse në inferioritet numerik.

Veselinoviç foli me fjalë të mëdha edhe për bashkëkombësin e tij, Ivan Gvozdenoviç, por shtoi se skuadra e tij do të luajë vetëm për fitore.

"Sigurisht që kemi një plan për ndeshjen nesër. Sot do të zhvillojmë edhe stërvitjen e fundit. Kemi probleme me disa lojtarë të cilët janë të skualifikuar si pasojë e kartonave. Gjithashtu në stërvitjen e sotme do të shikojmë edhe gjendjen e disa lojtarë të cilët kanë shfaqur probleme. Por ndeshjen nga minuta e parë sigurisht do ta nisin ata që kanë kondicionin e duhur fizik.

Kam respekt për Skëndërbeun, sikurse për të gjitha klubet e tjera. Janë një skuadër me ambicie. Në dy ndeshjet e fundit ndaj Bylisit dhe Elbasanit ata kanë luajtur mjaft mirë. Sidomos ndaj Elbasanit ata luajtën për shumë minuta me 10 lojtarë, pas daljes me kartonë të kuq të Premçit. Edhe pse në inferioritet numerik ata luftuan për të marrë tri pikët ndaj Elbasanit. Janë një ekip i mirë me kualitet, por ne duhet të mendojmë për vetën tonë. Kolegu im Gozdenoviç ka një kohë të gjatë në krye të kësaj skuadre. Ka ide të qarta, Skënderbeu është një ekip i stabilizuar. Jam i sigurtë që do të gjejmë një atmosferë pozitive dhe një terren të mirë.

Çdo skuadër ka ambiciet e saj. Në futbollin modern pa agresivitet, pa motivim nuk mund të bësh asgjë. Është normale që ata do të futen në fushë për të fituar. Në futboll janë prezente të 3 rezultatet: fitore, barazim dhe humbje, do të shohim në fund çfarë rezultati do të prodhojë ndeshja. Në kampionatin shqiptar çdo javë është shumë interesante. Ne shënuam në Shkodër në minutën e 92-të, Laçi shënoi ndaj Tiranës në minutën e 98, këto gjëra ndodhin në futboll. E kam thënë shpesh kur kam dalë përpara jush në kampionatin shqiptar në këtë sezon çdo pikë e fituar është flori. Kjo është shumë pozitive për futbollin shqiptar", deklaroi ai.

Partizani do të sfidojë Skënderbeun në Korçë të mërkurën, duke nisur nga ora 17:00.