Skandal në Serbi/ Derbi kthehet në arenë lufte, tifozët gjakosin trajnerin

24 Shtator 2024, 16:03, Sport CNA

Skandal në Serbi/ Derbi kthehet në arenë lufte, tifozët

Derbi mes Partizanit të Beogradit dhe Crvena Zvezdës, u kthye në arenë lufte. Një kaos total shpërtheu në fushë dhe jo vetëm, menjëherë pas përfundimit të sfidës, e cila u fitua nga Crvena, me rezultatin e thellë 4-0.

Aleksandr Stanojeviç, trajneri i Partizanit të Beogradit, nuk do ta harrojë lehtë derbin. Jo vetëm për humbjen e rëndë, por për atë që ndodhi menjëherë pas vërshëllimës së fundit të arbitrit.

Në tunelin e dhomave të zhveshjes, disa lojtarë të Partizanit janë përleshur mes tyre dhe madje është dashur të ndërhyjë policia për të qetësuar gjërat.

Por diçka edhe më e bujshme ndodhi menjëherë më pas: ultrasit serb të Partizanit, fillimisht hodhën sende ndaj Stanojeviçit dhe stafit të tij, më pas ata u futën në dhomat e zhveshjes.

Tifozët thyen me gur xhamin e dhomës së zhveshjeve të Partizanit, duke shkaktuar lëndime tek anëtarët e skuadrës bardhezi. Trajneri Stanojeviç, i cili në atë moment ndodhej pranë dritares, ka pësuar çarje në kokë dhe qafë, teksa lëndime ka pësuar edhe ndihmësi i tij.

“Më goditën kështu, asgjë tjetër nuk ndodhi. Nëse do të kishte dalë ndeshja 0-0 nuk do të kisha ardhur, por duhet të tregoja respekt. Tifozët thyen një xham, i cili më goditi. Kam humbur pak gjak”, u shpreh Stanojeviç në konferencën pas ndeshjes.

Më pas, ai iu kthye diskutimit për futbollin: “Përsa i përket ndeshjes, unë marr përgjegjësitë e mia, është humbja më e keqe e karrierës sime. Është turp për të gjithë”, tha trajneri.

“Këto nuk janë gjëra të mira për futbollin. Nuk japim imazh të mirë”, është shprehur Vladan Milojeviç, trajner i Crvena Zvezdës, i cili ka dashur të shprehë solidaritetin me kolegun e tij.

“Një ndeshje futbolli nuk duhet të ngrihet në nivelin e një lufte, ky është thjesht futboll. Kështu shkoi, ne fituam. Është sportivitet, ne i urojmë dhe ata na përgëzojnë ne”, përfundoi ai.

Policia ka nisur hetimet, ndërsa pritet që autorët e këtij sulmi të dhunshëm të identifikohen dhe ndiqen penalisht.

Një situatë kaotike e krijuar, duke konfirmuar se futbolli serb është në një moment të vështirë. Vetëm pak ditë më parë, u zbulua një ndeshje e trukuar në ligën e parë, por duket se skandalet s’kanë të mbaruar.