E fundit!

17:50 Politikë

“Rama trajton turizmin si real estate”/ Këlliçi: Po u fal tokat e fermerëve biznesit të 5D

Deputeti i PD-së Belind Këlliçi ka hedhur akuza ndaj kryem...

Silvinjo nuk e grumbulloi/ Odise Roshi reagon për CNA.al: Më vjen keq, Kombëtares i uroj fat!

17 Mars 2023, 16:52, Sport CNA

Trajneri i ri i kombëtares shqiptare, Silvinjo ka publikuar sot listën e tij me lojtarët që do të grumbullojë për ndeshjen e tij të parë kualifikuese ndaj Polonisë. Në listë ka emrat e zakonshëm, por edhe surpriza.

Ajo që bie në sy është mungesa e Odise Roshit, anësorit kuqezi, i cili momentalisht aktivizohet me ekipin turk, Sakaryaspor dhe pavarësisht se po kalon një formë të shkëlyer duke luajtur titullar në cdo ndeshje, sërish nuk është ftuar nga tekniku i kombëtares për arsye teknike.

Vetë Odise Roshi, ka folur sot në një komunikim ekskluziv me CNA.al, duke mos pranuar kurrësesi të bëjë polemika, por i ka uruar fat lojtarëve kuqezinj. Gjatë fjalës së tij, Roshi ka përmendur edhe mundësinë e një rikthimi në Kategorinë Superiore, ku deklaron se për momentin nuk e mendon diçka të tillë. Në fund, "raketa" kuqezi tregon edhe ekipet e preferuara që ka në Shqipëri, por nuk lë pa përmendur edhe dy ekipet që i ka përzemër.

Roshi, si po shkon aventura e re te Sakaryaspor?

Jam përshtatur mjaft mirë. Për momentin jam titullar i padiskutueshëm te ekipi im dhe jam shumë i kënaqur me paraqitjet që po zhvilloj. Jam duke ndihmuar ekipin në garën për ngjitjen në elitë dhe jam një nga asistuesit më të mirë të skuadrës. Kjo që më lumturon dhe më motivon.

Mungon ftesa nga Silvinjo, si ndiheni?

Nëse më mirëkuptoni, nuk dua të flas për këtë çështje. Është zgjedhje e trajnerit dhe unë e respektoj. Normalisht që më vjen keq që nuk do jem pjesë e këtij grumbullimi. Dua t'iu uroj çunave të kombëtares një fitore me Poloninë. Do i mbështes patjetër.

Miku i juaj Balaj, u rikthye në Shqipëri. Ju, keni oferta nga Superioria?

Me thënë të drejtën, momentalisht nuk kam asnjë ofertë nga asnjë ekip shqiptar.

E mendoni rikthimin?

Besoj se është ende shpejt për ta menduar rikthimin, apo mbylljen e karrierës në Superiore. Jam duke gëzuar një formë të mirë sportive dhe shpresoj të vazhdoj kështu sa më gjatë.

Keni ndonjë ekip të preferuar në Superiore?

E ndjek kur kam kohë kampionatin shqiptar dhe dihet që ekipet që pëlqej më shumë janë Tirana, Partizani dhe Vllaznia. Por nuk mund të lë pa përmendur edhe Apoloninë dhe Flamurtarin që i kam në zemër.

A keni një mesazh për lojtarët dhe tifozët e kombëtares?

Ju uroj vetëm fitore me Poloninë. Kemi një grup të mirë që mund të shkojë larg. Gjithashtu kemi edhe tifozë pasionantë që na mbështesin gjithmonë. Suksese kombëtares!