Portugalia dështon për kryesimin, zbulohen kundërshtarët

28 Qershor 2026, 03:40, Sport CNA

Kolumbia ka siguruar vendin e parë në Grupin K të Kupës së Botës pas barazimit pa gola ndaj Portugalisë në një sfidë të luftuar dhe me raste të shumta për shënim. Rezultati 0-0 i mjaftoi përfaqësueses amerikano-jugore për të ruajtur kreun e grupit, ndërsa Portugalia e mbylli fazën e grupeve në vendin e dytë. Ndeshja nisi me ritëm të lartë dhe me Kolumbinë që tregoi menjëherë ambiciet për të kontrolluar lojën. Kordoba ishte protagonisti i minutave të para, duke rrezikuar fillimisht me një goditje me kokë që kaloi pak mbi traversë. Sulmuesi kolumbian krijoi edhe një tjetër mundësi të mirë, por portieri portugez Diogo Kosta reagoi në mënyrë të shkëlqyer dhe shmangu golin. Presioni i Kolumbisë vazhdoi dhe Arias iu afrua gjithashtu avantazhit. Goditja e tij dukej e destinuar për në rrjetë, por Ruben Neves ndërhyri në momentin e fundit duke larguar topin nga vija fatale.

Pas vështirësive të minutave të para, Portugalia filloi të fitonte terren. Kristiano Ronaldo pati mundësinë e parë për skuadrën e Roberto Martínez me një goditje dënimi nga distanca, por Vargas kontrolloi pa probleme. Pak minuta më vonë, portieri kolumbian realizoi një tjetër pritje të rëndësishme, kësaj here ndaj Bruno Fernandes nga një distancë e afërt. Në fundin e pjesës së parë, Feliks provoi me një goditje akrobatike brenda zonës, por topi përfundoi pak mbi traversë. Edhe Kolumbia pati momentet e saj, me Hames Rodrigez që testoi refleksin e Diogo Kostës, i cili reagoi saktë për të mbajtur portën e paprekur.

Edhe pjesa e dytë nisi në të njëjtën mënyrë. Feliks pati një tjetër mundësi të mirë për Portugalinë, por goditja e tij me kokë nuk gjeti kuadratin. Me kalimin e minutave, Kolumbia filloi të merrte kontrollin e lojës. Riçard Rios, i aktivizuar nga stoli, iu afrua golit, por goditja e tij kaloi ngjitur me shtyllën. Pak më vonë, Arias provoi sërish, por Diogo Kosta realizoi një tjetër pritje të rëndësishme. Në minutat e fundit Kolumbia u tregua më këmbëngulëse në kërkim të golit të fitores. Sulmet e njëpasnjëshme vunë në vështirësi mbrojtjen portugeze, ndërsa portieri Kosta vazhdoi të ishte një nga lojtarët më të spikatur në fushë.

Momenti më i diskutuar i sfidës erdhi në kohën shtesë. Davinson Sançez dërgoi topin në rrjetë. Megjithatë, pas verifikimit të aksionit, goli u anulua për një pozicion minimal jashtë loje. Kolumbia ruajti vendin e parë në Grupin K dhe vazhdon e pamposhtur pas 90 minutave në katër ndeshjet e fundit të Kupës së Botës kundër skuadrave evropiane, me dy fitore dhe dy barazime. Me këtë rezultat, Kolumbia siguron kreun e grupit dhe në raundin e 32 skuadrave më të mira do të përballet me Ganën. Ndërkohë, Portugalia e Roberto Martinez renditet në vendin e dytë dhe në fazën tjetër do të ketë përballë Kroacinë.

Në ndeshjen tjetër, Kongo triumfoi 3-1 ndaj Uzbekistanit me përmbysje dhe siguroi kualifikimin historik, si një nga vendet e treta më të mira me 4 pikë.