Përfundon dënimi për Pogba, bëhet gati për aventurën e re

10 Mars 2025, 19:55, Sport CNA

Përfundon dënimi për Pogba, bëhet gati për

Pas një periudhe të gjatë ankthi dhe pasigurie, Paul Pogba më në fund sheh dritë në fund të tunelit. Kjo e martë e 11 marsit, shënon përfundimin e pezullimit që i ishte imponuar mesfushorit francez pas testit pozitiv për testosteron në shtator të vitit 2023. Fillimisht, Pogba u dënua me një pezullim të rëndë prej katër vitesh, një vendim që tronditi botën e futbollit. Megjithatë, pasi çështja u shqyrtua nga Gjykata e Arbitrazhit Sportiv, sanksioni iu ul në 18 muaj, duke i dhënë mundësinë të rikthehet në fushë shumë më shpejt nga sa pritej. Por edhe pse është i lirë të rifillojë karrierën e tij, rikthimi i Pogbasë në fushën e lojës nuk është aq i thjeshtë. Me kampionatet evropiane tashmë në fazat e tyre përfundimtare dhe me kufizimet rregullatore në fuqi, opsionet për një kthim të menjëhershëm duken të pakta.

Pas dënimit, marrëdhënia e Pogba me Juventusin u përkeqësua ndjeshëm. Më 15 nëntor, lojtari dhe klubi vendosën të ndërprisnin kontratën, një vendim që hyri në fuqi dy javë më vonë. Në atë kohë, Pogba kishte ende një vit të mbetur në kontratën e tij me “Zonjën e Vjetër”, por pas skandalit të dopingut, të dyja palët ranë dakord që ishte më mirë të ndaheshin. Juventus nuk dëshironte të mbante një lojtar që nuk mund të luante, ndërsa Pogba kërkonte një fillim të ri larg Italisë.

Tani që pezullimi ka përfunduar, 31-vjeçari është i vendosur të rikthehet dhe të provojë se ende ka shumë për të dhënë në fushë. Megjithatë, sfida më e madhe për të është gjetja e një skuadre të re, duke qenë se tregu evropian i transferimeve është tashmë i mbyllur. Për Pogban, një rikthim i menjëhershëm në kampionatin francez, nuk është i mundur. Sipas rregullave të ligës franceze, asnjë klub nuk mund të nënshkruajë me një lojtar të lirë pas mbylljes së afatit kalimtar të janarit. Një nga skuadrat që kishte shprehur interes për shërbimet e tij ishte Marseja, por edhe nëse dëshira e tyre ekziston ende, ata nuk kanë mundësi ta transferojnë atë deri në merkaton e verës. Kjo e bën Evropën një destinacion pothuajse të pamundur për Pogbanë në këtë fazë të sezonit.

Një nga opsionet më të realizueshme për Pogba është kampionati amerikan. Ish-mesfushori i Juventusit ka një shtëpi në SHBA dhe kohët e fundit është parë në shoqërinë e David Beckam, pronarit të Inter Miami. Pogba dhe Beckam kanë një marrëdhënie të mirë, dhe duke marrë parasysh që skuadra e Floridës tashmë ka yje si Lionel Mesi, Luis Suarez, Serxho Buskets dhe Zhordi Alba, afrimi i Pogba do të ishte një lëvizje që do ta përforconte edhe më shumë ekipin.

MLS ka treguar një gatishmëri për të afruar lojtarë të mëdhenj evropianë, duke ofruar kontrata të majme dhe kushte të favorshme. Për Pogba, kjo mund të jetë mundësia perfekte për t’u rikthyer në formën e tij më të mirë dhe për të ringritur karrierën e tij, larg presionit dhe kritikave të vazhdueshme që ka hasur në Europë. Një tjetër destinacion potencial për Pogban është kampionati saudit, i cili vitet e fundit ka tërhequr disa nga emrat më të mëdhenj të futbollit botëror. Nga një këndvështrim financiar, Arabia Saudite mund të jetë opsioni më i favorshëm për mesfushorin francez. Miqësia e tij me Karim Benzema dhe fakti që te Al Itihad do të gjente edhe ish-shokun e tij të kombëtares, N’Golo Kante, mund ta bëjnë Arabinë Saudite një destinacion shumë tërheqës për Pogba.