E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Performanca e Kombëtares në “Euro 2024”/ Rraklli, për CNA TV: Lojtarët dhanë shpirtin

19 Qershor 2024, 10:35, Sport CNA

Performanca e Kombëtares në “Euro 2024”/ Rraklli,

Altin Rraklli

Performanca e Kombëtares shqiptare të futbollit në "Euro 2024" në përballjen me Italinë ngjalli polemika të shumta.

Ish-futbollisti Altin Rraklli, në një intervistë për CNA TV, me gazetaren Fabjona Pasho, analizoi çfarë ndodhi dhe pritshmëritë ndaj kuqezinjve.

"Duhet ta ndajmë performancën, gabimet individuale që bënë shumë lojtarë, me dëshirën e madhe dhe shpirtin e garës që ishte aty, te gjithë lojtarët. Bëmë disa gabime, që na çuan në disfatë. Si ndeshje, unë dua ta përgjithësoj si një ndeshje të një karakteri të mirë, të një këmbënguljeje, të një vullneti të mirë të skuadrës. Duhet të keni parasysh se gabimet individuale ndahen në gabime individuale në moment të fundit dhe komplet. Në rastin konkret, Hysaj nuk ishte i vetmi gabim, aty filluan gabimet radhazi, te dy-tre lojtarë. Ajo e Hysajt, unë mendoj mund t'i ndodhë çdo lojtari, sepse është instinkt, edhe që të mos e devijosh topin. Shumica e lojtarëve aty nuk janë të përgatitur. Te një faull që ne kemi, godet Asllani dhe i bie në kokë një lojtari të Italisë, por ai ishte i mbështetur në mur, e priste atë. Nuk ia vlen ta kryqëzojmë Hysajn, sepse ai dha maksimumin në atë ndeshje. Gabim individual bëri dhe Seferi te markimi i lojtarit që bëri topin e parë me kokë dhe ai ishte kryesori, sepse ai gol e ktheu lojën. Aty nuk u treguam të vëmendshëm, sidomos Seferi me lojtarin që kishte direkt 1 kundër 1, i hyri mbrapa krahëve dhe ai nuk e pa. Pra, këto janë gabime që na shkaktuan edhe golat. Ne bëmë edhe gabime kolektive. Mënyra se si e tërhoqëm kundërshtarin, si i dhamë hapësirë, u tërhoqëm 40 metra para portës sonë, gjë që i dha kundërshtarit për të kuptuar: 'Ju jeni më të fuqishëm, hajde na sulmoni dhe ne do rrimë këtu mbrapa'", u shpreh ai.

Rraklli theksoi gjatë intervistës se mes tri skuadrave që ne kemi në grup, Kroacinë e shikon më të dobëtën.

"Janë të tria skuadra elitare, për mua i takojnë fazës së parë. Këto vitet e fundit, Kroacia mund të mundet më lehtë se këto dy të tjerat. Është skuadër e thyer në moshë, të njëjtët lojtarë që luajnë kaq vite", tha ai.

Ai dha edhe një këshillë për tifozët kuq e zi.

"Ne duhet të mësojmë të bëjmë tifo në momentet që skuadra ka nevojë. Pra, momentet që skuadra luan dobët, duhet të ngrihet gjithë stadiumi, ta përkrahin. Tifozët shqiptarë duhet të festojnë pas ndeshjes, jo para", tha ai.

Këtë të mërkurë, në orën 15:00, Kombëtarja shqiptare e futbollit luan në Hamburg të Gjermanisë, kundër Kroacisë, rivalit të Grupit B në "Euro 2024"./CNA