Ndryshimi i trajnerit dhe ndeshja me Apoloninë, Zguro: Koha të flasim në fushë, Gvozdenoviç na ka kërkuar diçka

29 Nëntor 2022, 17:23, Sport CNA

Ndryshimi i trajnerit dhe ndeshja me Apoloninë, Zguro: Koha të flasim

Skënderbeu hyn në javën përgatitore për të rikuperuar ndeshjen e prapambetur me Apolonisë. Me ndryshimin e trajnerit, tashmë do të kërkojnë të kthehen te fitorja. Një trepikësh do të përkthehej me vendin e 4-t në renditje dhe kjo do të ishte forma më e mirë për t’i dhënë fund krizës. I këtij mendimi është edhe Vangjel Zguro. Kapiteni beson se ky pushim i ka bërë mirë ekipit për të rimarrë veten si në aspektin e lojës, ashtu edhe në atë psikologjik. Gjatë një deklarate të dhënë për “Panorama Sport”, mbrojtësi i majtë qartëson se do ta arrijnë objektivin final:

“Kishim nevojë për këtë shkëputje, pasi nuk po kalonim momente të mira. Nuk po arrinim dot të dilnim në lojën tonë dhe të shkonim te rezultatet e dëshiruara. Na vjen keq pasi objektivi është krejt i ndryshëm nga vendi i 7-të, ku jemi aktualisht në renditje.

Ndaj besojmë se pas këtij pushimi, ekipi do të dijë të reagojë dhe të ringrihet për të shkuar atje ku i takon.

Kemi punuar fort gjatë këtyre ditëve dhe do të mundohemi që t’i vëmë në dukje cilësitë tona që në ndeshjen e parë”.

TRAJNERI – Rokada në stol pritet që të japë impaktin e vet në kamp. Prej një jave, Ivan Gvozdenoviç ka marrë drejtimin dhe po punon me skuadrën për të lënë pas periudhën e errët që po kalonin korçarët me dy barazime dhe një humbje në ndeshjet e fundit.

Për pogradecarin duhet ende pak kohë që lojtarët të kuptojë mentalitetin e trajnerit, që në vetvete duket mjaft profesionist. “Është ende herët të flasim për ndryshime që vijnë nga trajneri pasi ka vetëm pak ditë që punojmë me të.

Mund të them se Gvozdenoviç është mjaft profesionist dhe po punon shumë me ne.

Gjatë këtyre ditëve është duke punuar më shumë në aspektin psikologjik, për të rritur moralisht ekipin, pasi cilësi ka në grup dhe duhet të vihen në zbatim nga lojtarët.

Mendojmë se do të jetë ndryshimi i duhur dhe do të vijë pak e nga pak”, theksoi 29-vjeçari.

APOLONIA – Ndeshja që do të luhet këtë të diel është mjaft e rëndësishme për të rikthyer ekipin drejt sukseseve. Kapiteni nuk kërkon të zgjatet shumë me komentet për këtë 90-minutësh, pasi kërkon që fusha të flasë në këto momente.

“Ne kemi folur shumë dhe nuk është më koha për fjalë. Duhet të shprehemi në fushë dhe të bëjmë më të mirën tonë. Skënderbeut nuk i shkon vendi i shtatë në renditje.

Duhet të jemi me çdo kusht në dy vendet e para. Do të shkojmë në Fier për të marrë maksimumin. Këtë kërkon dhe Gvozdenoviç nga ne, të luajmë siç duhet të luajnë lojtarët e Skënderbeut”, përfundoi Vangjel Zguro.