E fundit!

11:30 Denoncim

Denoncimi dhe analiza/ Drejtësia e re administrative, banale, e paaftë, e korruptuar

Reforma në drejtësi pretendoi se do të sillte në Shqipëri ...

Ndryshime te Juventusi, merret vendimi për trajnerin Tudor

16 Prill 2025, 11:29, Sport CNA

Pas një periudhe të trazuar që ka lënë gjurmë të thella në ambientin bardhezi, duket se stuhia ka kaluar dhe mbi horizontin e Juventusit po shfaqen rreze shprese. Megjithatë, për të konfirmuar nëse pas kësaj stuhie do të shfaqet një ylber i vërtetë, do të duhet ende pak kohë. Një fund sezoni i mbushur me tension, por edhe me optimizëm, po shërben si provë për kursin e ri që po ndërtohet me trajnerin Igor Tudor në krye. Objektivi është i qartë, kualifikimi në Ligën e Kampioneve, një kusht thelbësor për të garantuar stabilitet ekonomik dhe ambicie sportive për të ardhmen.

E ardhmja e trajnerit kroat në pankinën bardhezi nuk është më një mister. Edhe pse ende pa një zyrtarizim, gjithçka tregon se Tudor po fiton besimin e drejtuesve me punën e tij në fushë. Drejtori sportiv Giuntoli ka filluar tashmë bashkëpunimin me të për ndërtimin e skuadrës së sezonit të ardhshëm, pavarësisht se ende nuk është vënë pika mbi “i”. Te torinezët ka filluar puna për një verë të nxehtë transferimesh, ku nuk pritet revolucion, por përforcime të kalibrit ndërkombëtar, që do t’i japin skuadrës një hap përpara në cilësi dhe ambicie.

Departamenti që është vënë më së shumti nën lupën e Giuntolit është mesfusha, e cila këtë sezon ka vuajtur jo pak nga dëmtimet dhe forma e dobët e disa elementëve. Emri që intrigon më shumë në zyrat e Juventusit është ai i Sandro Tonalit, ish-lojtarit të Milanit dhe aktualisht pjesë e Newcastle në Premier League. Transferimi i tij nuk do të jetë i lehtë dhe as i lirë, pasi flitet për një shumë që varion nga 40 deri në 50 milionë euro. Për t’i hapur rrugë një operacioni të tillë, bardhezinjtë synojnë largimin e Douglas Luiz, i cili ka pasur një sezon për t’u harruar për shkak të formës së dobët dhe dëmtimeve të shpeshta.

Në repartin ofensiv, ndryshimet do të jenë më të mëdha. Pas dy vitesh me ulje-ngritje, duket se epoka e Vlahoviç te “Zonja e Vjetër” po shkon drejt fundit. Sulmuesi serb është kandidati kryesor për t’u larguar gjatë verës, qoftë për të sjellë para në arkën e klubit, qoftë për t’u përdorur si pjesë e ndonjë shkëmbimi të madh. Edhe Kolo Mani, i huazuar nga PSG-ja, nuk është më një siguri, pavarësisht entuziazmit të fillimit. Kjo e detyron Juventusin të mendojë për dy blerje në sulm. Emri më i lakuar është ai i Viktor Osimhen, por për nigerianin pritet një garë e ashpër, me Gallatasarain që do të bëjë gjithçka për ta mbajtur. Si alternativa serioze shihen Ademola Lukman i Atalantës dhe Rasmus Hojlund i Mançester Junajtid, dy profile që i përshtaten stilit të Tudor dhe filozofisë së re që po ndërtohet.

Sigurisht, për të bërë realitet këto lëvizje, Juventusi ka nevojë për burime të qëndrueshme financiare. Kualifikimi në Champions League është baza kryesore, por do të ndihmojnë shumë edhe të ardhurat nga pjesëmarrja në Botërorin për Klube dhe ato nga shitja e lojtarëve në huazim. Giuntoli pritet të arkëtojë deri në 50 milionë euro nga lojtarë që nuk do të rikthehen më në Torino, si Arthur, Kostiç dhe Rugani.

Këto para do të përdoren pjesërisht për të përfunduar transferimet e Kalulu dhe Renato Veiga, që aktualisht janë në huazim, por pëlqehen nga stafi dhe mund të bëhen pjesë e projektit të ri në mënyrë të përhershme. Për herë të parë pas shumë kohësh, tek Juventusi ndjehet një frymë e re, një kombinim mes qetësisë, profesionalizmit dhe ambicieve të mëdha.