Inter-Bayern/ Inzaghi me "këmbë në tokë", Kompany: Ndeshje speciale

15 Prill 2025, 20:50, Sport CNA

Inter-Bayern/ Inzaghi me "këmbë në tokë", Kompany:

Interi dhe Bayern Munich do të përballen mes tyre, në sfidën e kthimit në çerekfinalen e Ligës së Kampioneve.

Zikaltërit luajnë në shtëpi me avantazhin 2-1 të ndeshjes së parë, por trajneri Simone Inzaghi ka kërkuar nga skuadra e tij që të mos mendojnë për rezultatin.

Në konferencën për shtyp, trajneri i italianëve vlerësoi maksimalisht kundërshtarin, duke thënë se do të jetë një ndeshje më e vështirë se ajo në Mynih.

“Nuk ka tension, por më shumë ka krenari për atë që po bëjmë këtë sezon. Duam ta përsërisim ndeshjen e parë. Në “San Siro” do të jetë një sfidë e madhe, por edhe më e vështirë se ajo e para.

Ndaj Bayern Munich do të jetë një ndeshje shumë e vështirë. Duhet ta harrojmë rezultatin e takimit të parë, por jo performancën. I dimë vlerat e kundërshtarit.

Është një sezon i vështirë, por përpjekjet kthehen në kënaqësi dhe ne duam të vazhdojmë kështu. Bajerni nuk ka vetëm anësorët të fortë, por të gjithë ekipin. Kanë një trajner, të cilin e kam respektuar shumë edhe si lojtar, ndërsa në një kohë të shkurtër i ka dhënë skuadrës parimet e tij të lojës. Duhet të luajmë mirë teknikisht, për ta mbajtur sa më shumë topin.

Ndeshja e parë u interpretua shumë mirë, por duhet të jemi të kujdesshëm. Nuk ishte një finale, por pjesa e parë e një sfide të dyfishtë”, deklaroi Inzaghi.

Në krahun tjetër, trajneri i bavarezëve, Vincent Kompany, u shfaq besimplotë se skuadra e tij mund ta përmbysë rezultatin.

“Duhet të fillojmë nga ideja se detajet mund të bëjnë diferencën. Ndonjëherë netë si këto janë speciale. Ne mund t’i quajmë si të tilla. Janë disa ndeshje ku nevojitet shumë pak, për të vendosur fatin e saj. Kjo ndodhi në takimin e parë.

Të kujtojmë rastet e shumta, të cilat duhet t’i kishim shfrytëzuar. Shpresojmë t’i kemi sërish. Kjo skuadër ka pasur disa probleme fizike dhe jemi përpjekur të rikuperojmë energji për të qenë të rrezikshëm. Gjëja e fundit që do të bëja është që të fajësoj një lojtar të caktuar. Unë kam besim tek të gjithë lojtarët që kam në ekip.

Çfarë Interi pres? Për këtë duhet të pyesni trajnerin e tyre. Nëse ata vendosin të luajnë lart dhe në sulm, ne duhet të jemi të përgatitur për këtë. Mendoj se gjëja më e rëndësishme është cilësia e dy skuadrave, duhet të dini se si të merrni vendimet e duhura në momente të ndryshme të lojës”, u shpreh Kompany.

Ndeshja mes Interit dhe Bayern Munich do të luhet në “San Siro”, të Mërkurën në orën 21:00.