Mungesa e Gjimshiti, zgjedhja e trajnerit Silvinjo për mbrojtjen

8 Qershor 2025, 16:37, Sport CNA

Shqipëria do të përballet me Letoninë, me një mungesë të konfirmuar në repartin e mbrojtjes.

Kapiteni Berat Gjimshiti nuk do të jetë në dispozicion të trajnerit Silvinjo për sfidën e vlefshme për Grupin K të kualifikueseve të Botërorit 2026, për shkak se ka plotësuar numrin e kartonëve të verdhë.

Mbrojtësi i Atalantës u ndëshkua gjatë barazimit 0-0 ndaj Serbisë. Ky ishte kartoni i tij i tretë në këto eliminatore, çka sjell automatikisht ndalimin me një ndeshje, sipas rregullores së FIFA-s për kualifikueset.

Gjimshiti është një mungesë të rëndësishme për skuadrën kuqezi, si për rolin e tij si lider në fushë, ashtu edhe për stabilitetin që sjell në qendër të mbrojtjes. Që prej fillimit të fushatës kualifikuese, ai ka qenë një pikë kyçë në prapavijë, duke si titullar dhe duke kontribuar në organizimin dhe vendosjen e linjës së fundit të skuadrës.

Për të plotësuar boshllëkun e lënë nga mungesa e kapitenit, stafi teknik pritet të bëjë disa lëvizje në organikën e lojtarëve të grumbulluar. Një ndër alternativat më të mundshme është rikthimi në skuadër i Adrian Bajramit. Mbrojtësi që në ndeshjen ndaj Serbisë ishte i pranishëm në tribunë, mund të përfshihet në listën e 23-shes për përballjen me Letoninë, për të ofruar një zgjidhje shtesë në repartin mbrojtës.

Ndërkohë, vendin e Gjimshitit në formacionin titullar pritet ta zërë njëri nga dy emrat e tjerë me eksperiencë në prapavijë: Ardian Ismajli ose Marash Kumbulla. Të dy mbrojtësit janë pjesë e rregullt e listave të trajnerit Silvinjo dhe kanë zhvilluar ndeshje të rëndësishme me fanellën kuqezi. Forma fizike aktuale, ecuria në stërvitje dhe përshtatja me skemën taktike do të jenë faktorët kryesorë që do të ndikojnë në përzgjedhjen përfundimtare të titullarit.

Në kushtet aktuale, Gjimshiti mbetet mungesa e vetme e konfirmuar për takimin ndaj Letonisë. Skuadra kuqezi vijon përgatitjet me grupin e plotë në pjesën tjetër të repartëve, ndërsa stafi teknik është i përqendruar në analizën e kundërshtarit dhe përshtatjen e planit të lojës për të siguruar tri pikët.

Ndeshja kundër Letonisë është vlerësuar si tejet e rëndësishme për ecurinë në Grupin K, duke marrë parasysh që skuadra shqiptare kërkon të mbajë ritmin e garës për një vend kualifikues drejt Kupës së Botës 2026.