Memelli “qan” 4 pikët e lëna në shtëpi: Korabi i fortë, transfertat janë si… çlirim

13 Nëntor 2022, 12:39, Sport CNA

Memelli “qan” 4 pikët e lëna në shtëpi: Korabi i

Migen Memelli

Skënderbeu pas dy barazimesh do të luajë në transfertë ndaj Korabit për të kërkuar rikthimin te rezultatet pozitive. Vetë trajneri bardhekuq, pas dy barazimesh radhazi në shtëpi, është munduar të ngrejë moralin e të tijve, pasi katër pikë të lëna në të tilla kushte duket se sjellin njëfarë lëkundjeje të moralit.

Në një prononcim për “Panorama Sport”, trajneri Memelli bën analizën e ekipit të tij pas këtyre dy barazimeve dhe situatën aktuale në grup.

“Normalisht që të barazosh dy ndeshje radhazi në shtëpi, për me tepër në atë mënyrë se si erdhën këto barazime, diçka nuk të ngroh ashtu si duhet. Duhet të jemi të vetëdijshëm se në ndeshjen e fundit luanim përballë Flamurtarit, që kishte një skuadër të kompletuar dhe me shumë elementë cilësorë. Por gjithsesi, kemi bërë një ndeshje të mirë dhe nuk kemi çeduar në asnjë moment përballë tyre, pavarësisht cilësive.

Të vjen keq dhe kjo është ajo që ne vuajmë më shumë, pasi pësojmë golin në të vetmin rast që kundërshtarët godasin portën. Këtë e kemi analizuar gjatë, pasi si Flamurtari, ashtu edhe Besëlidhja na kanë shënuar në goditjen e parë që na bënë në kuadrat. Jemi ndalur gjatë për t’i analizuar dhe është diçka që duhet ta rregullojmë sa më parë”, theksoi fillimisht Migen Memelli.

KORABI – Më pas trajneri bardhekuq është ndalur edhe te ndeshja e radhës në transfertë përballë Korabit. Memelli vlerëson kundërshtarin dhe pret një ndeshje të vështirë këtë javë. Numri një i pankinës bardhekuqe thekson se Skënderbeu i tij duhet të bëjë një ndeshje të mirë, sikundër i ka bërë në javët e fundit për të marrë maksimumin e mundshëm në këtë transfertë të vështirë.

“Normalisht që ndeshja ndaj Korabit është e vështirë, pasi të gjitha takimet në këtë nivel janë të tilla. Do të luajmë në transfertë me një kundërshtar cilësor, siç është Korabi. Jemi shumë pranë në renditje dhe kjo tregon se sa e rëndësishme është kjo ndeshje, mbi të gjitha sa delikate. Ne e kemi vlerësuar maksimalisht një gjë të tillë. Do të shkojmë atje që të tregojmë vlerat tona. Nëse u referohemi statistikave, Skënderbeu në këtë sezon ka marrë më shumë pikë në transfertë sesa në shtëpi. Ndoshta atje lojtarët tanë, kryesisht të rinjtë luajnë më lirshëm dhe pa presionin e publikut vendës. Kjo është ajo që më ngroh dhe mbi të gjitha fakti që jemi duke prodhuar lojë të mirë. Prandaj do të mundohemi të japim më të mirën në këtë takim”, përfundoi prononcimin trajneri i Skënderbeut, Migen Memelli.

MUNGESAT – Në ndeshjen e së hënës ndaj Korabit, korçarët do të kenë sërish të padisponueshëm kapitenin Vangjel Zguro dhe shkodranin e prapavijës Ditmir Beci. Të dy lojtarët janë ende me probleme fizike dhe për pasojë do të humbasin ndeshjen e radhës ndaj Korabit.