Kampion i Italisë, Antonio Conte: Titulli më i vështirë në karrierë

24 Maj 2025, 00:01, Sport CNA

Kampion i Italisë, Antonio Conte: Titulli më i vështirë

Napoli u shpall kampion i Italisë për sezonin 2024–2025, duke fituar titullin e katërt në historinë e klubit dhe të parin nën drejtimin e trajnerit Antonio Conte. Ky është gjithashtu titulli i pestë në karrierën e Contes si trajner në kampionatin italian.

Pas përfundimit të ndeshjes me Kaljarin që vulosi triumfin, Conte deklaroi se arritja e këtij titulli ishte një sfidë e madhe dhe e vështirë.

Trajneri vlerësoi kontributin e lojtarëve, sidomos të atyre që kishin qenë pjesë e ekipit kampion dy vite më parë dhe që sezonin e kaluar u renditën në vendin e 10-të.

Konte e cilësoi këtë titull si më të vështirin në karrierën e tij, për shkak të gjendjes në të cilën e gjeti skuadrën kur mori drejtimin.

“Ndodhi sërish, është fantastike dhe e bukur. Ishte e vështirë të mbërrije në stadium për shkak të turmës së madhe të njerëzve. Sinqerisht, më kaloi një mendim i vogël në kokë për mundësinë e një zhgënjimi, do të na kishte ndjekur për shumë kohë. Por djemtë ishin të jashtëzakonshëm. Kishte një presion të jashtëzakonshëm, por e përballuam ndeshjen në mënyrën më të mirë. Merita i takon kësaj skuadre, veçanërisht lojtarëve që fituan para dy vitesh dhe më pas përfunduan të dhjetët. Gjithashtu, arritëm të përshtasim mirë lojtarët e rinj që erdhën.

Pa dyshim, ky është titulli më i vështirë në karrierën time, por edhe më sfiduesi. Të vish në Napoli pas një vendi të dhjetë dhe të përpiqesh të rindërtosh gjithçka, duke bindur edhe lojtarët më të mirë që t’i besojnë projektit, nuk ishte aspak e lehtë.

Të fitosh në Napoli është shumë e vështirë. Di Lorenzo, si edhe djemtë që fituan para dy vitesh, kanë vlera të rëndësishme, ndryshe nuk do të ndodhte të fitonin sërish në një hark kaq të shkurtër kohor. Fakti që Di Lorenzo, si kapiten, ngre trofeun e kampionatit për herë të dytë, ashtu si vetëm Maradona më parë, është diçka e jashtëzakonshme dhe e merituar. Aq më tepër në një situatë jo të lehtë, sepse ky nuk është një klub që e nis sezonin gjithmonë me objektivin për të fituar”, u shpreh Conte.

Napoli e mbylli kampionatin si kryesues me 82 pikë, 1 më shumë se Interi i vendit të dytë.