I përfundon kontrata me Vllazninë, Latifi transferohet te Tirana në verë?

22 Prill 2023, 14:41, Sport CNA

Liridon Latifi pritej të merrte përsipër Vllazninë këtë sezon por një dëmtim i rëndë në fillim bëri që të qendrojë për një periudhë të gjatë jashtë fushave të lojës. Krahas dëmtimeve, edhe çështjet disiplinore e lanë jashtë për pak javë por tashmë gjithçka është lënë pas dhe sulmuesi e ka nisur titullar 2 sfidat e fundit, madje duke gjetur edhe golin e parë këtë sezon ndaj Erzenit.

E ardhmja e tij është një pikëpyetje e madhe në kampin shkodran me disa pista që “trazojnë” ujërat. Kontrata e kosovarit skadon në fund të sezonit dhe ende nuk janë ndërmarrë hapa konkret për zgjatjen e saj, me drejtuesit që sigurisht duan të mbajnë në ekip një yll si ai.

Për Latifin, interes të fortë kishte shfaqur Tirana sezonin e shkuar por në fund, 29-vjeçari pranoi ofertën e shkodranëve. Tirana do t’i hyjë një revolucioni në verë dhe një sulmues klasi pritet të vijë, ndaj nuk është aspak çudi që Latifi të jetë në listën e bardhebluve. Edhe pista e rinovimit qëndron, me lojtarin që është shprehur disa herë se i pëlqen jetesa në Shkodër ndërsa nuk përjashtohet as e ardhmja jashtë Shqipërisë.

Shkurt, një pikëpyetje e madhe për të ardhmen e ish-yllit të Skënderbeut të artë, me të treja pistat që janë mëse reale.