E fundit!

11:01 Aktualitet

Klodjan Braho mesazh të qartë politikës: Për SPAK të gjithë janë të barabartë para ligjit

Kreu i SPAK Klodjan Braho i ka përcjellë mesazhin e qartë ...

Gvozdenoviç: Do të jemi surpriza e sezonit

28 Qershor 2023, 14:49, Sport CNA

Skënderbeu ka nisur prej dy ditësh fazën përgatitore në Korçë. Fillimisht në stërvitje ka dalë një grup lojtarësh, të cilët duhet të kalojnë në “sitë” nga stafi teknik, e më pas të diskutojnë me presidentin Ardjan Takaj për të firmosur kontratën.

Nga titullarët e sezonit të kaluar, vetëm disa prej tyre janë paraqitur që në ditën e parë të stërvitjes, ndërsa të tjerët kanë marrë leje nga klubi dhe do të vihen në dispozicion të trajnerit javën e ardhshme.

Emra si Klevis Shaqe, Markos Ramos, Suhejl Muharem, Marko Alia, Mario Rabiu, Kristian Keqi, Ermir Rashica, Alkeo Bani, Orestis Ademaj dhe Dejvid Janaqi janë lojtarët e afruar nga merkatoja, por një pjesë e tyre nuk kanë firmosur ende. Mirëpo, Ivan Gvozdenoviç është shprehur mjaft optimist dhe i kënaqur me grupin e lojtarëve, ndërsa bën me dije se është në pritje edhe të katër afrimeve që do t’i bashkohen ekipit gjatë muajit korrik.

Serbi theksoi se me këtë ekip premton mjaft surpriza.

“Jemi në ditën e dytë të përgatitjeve dhe nuk janë të gjithë lojtarët në skuadër, pasi një pjesë e tyre ende nuk kanë mbërritur, sepse janë me leje nga klubi. I presim të gjithë të jenë më 3 korrik në skuadër. Përtej vonesave, mund të them se jam shumë i kënaqur nga mënyra se si kemi lëvizur në merkato dhe afrimet që janë bërë për ndërtimin e ekipit. Do të bashkohen edhe katër apo pesë lojtarë, që do të vijnë në provë dhe jam i sigurt se kur të fillojë kampionati, do të jemi gati për sezonin e ri. Deri tani zyrtarisht kemi firmosur me gjashtë lojtarë, ndërsa të tjerë priten në ditët në vijim. Klubi dhe presidenti Takaj më kanë mbështetur në çdo kërkesë që kam pasur dhe kam vënë re angazhim maksimal. Kjo më kujton Skënderbeun e madh, sepse është e njëjta strategji”, ka thënë Gvozdenoviç.

I ndalur tek objektivat për kampionatin, Gvozdenoviç është shprehur se ende nuk janë përcaktuar për sezonin e ri, por sipas tij Skënderbeu, do të jetë surprizë. “Ende nuk kemi përcaktuar objektivat sezonalë, pasi nuk kemi mbyllur plotësisht 25 lojtarët që do të jenë në ekip për kampionatin e ri. Më pas do të flasim për këto, por unë di që na pret një sezon i vështirë dhe normalisht do të ketë shumë rivalitet. Skënderbeu im do të jetë surprizë e këtij sezoni, për momentin kaq mund të them.

Do të kemi kohë të flasim më me detaje për gjithçka”, përfundoi trajneri i Skënderbeut. Ndërkohë, nga afrimet e deritanishme, kanë qenë prezentë në seancën e parë vetëm 6 futbollistë. Pjesa tjetër e afrimeve, por edhe lojtarët që janë në kontratë, pritet të bashkohen me ekipin në fillim të korrikut. Mesa duket Skënderbeu i ri do të jetë i fokusuar më tepër te lojtarët e rinj që mund të shpërthejnë në Kategorinë Superiore, teksa disa e kanë për herë të parë si Shaqe, Ramos, Muharem, Alia, Rabiu, Keqi, Rashica etj.