E BUJSHME/ UEFA mendon ndryshimin e madh për kualifikueset

15 Tetor 2025, 18:59, Sport CNA

UEFA po shqyrton mundësinë për të ndryshuar sistemin aktual të kualifikueseve për Kampionatin Europian dhe për Kupën e Botës, me synimin për të shmangur ndeshjet e pabarabarta dhe për të krijuar më shumë përballje të nivelit të lartë mes kombëtareve. Lajmi është raportuar nga e përditshmja franceze “L'Equipe”, sipas së cilës institucioni më i lartë i futbollit europian po diskuton për një model të ri organizimi të kualifikueseve, të frymëzuar nga formati i ri i Ligës së Kampionëve.

Ideja kryesore është të rritet niveli i garës duke shmangur ndeshjet ku diferenca mes ekipeve është shumë e madhe. Kjo do të sillte më shumë përballje direkte mes skuadrave të mëdha, duke e bërë kalendarin e kombëtareve më tërheqës për tifozët, mediat dhe partnerët komercialë.

Presidenti i UEFA-s, Aleksander Ceferin, e kishte përmendur këtë mundësi edhe nw tw kaluarwn, duke folur për nevojën e një formati më modern dhe më konkurrues. Aktualisht po shqyrtohen disa variante: një mundësi është që Liga e Kombeve të përdoret si rrugë alternative për kualifikimin në turnetë e mëdhenj, ndërsa një tjetër parashikon krijimin e një kampionati të vetëm me 54 skuadra pjesëmarrëse ose ndarjen e tyre në dy grupe prej 27 kombëtaresh secili.

Ky sistem do të mundësonte një numër më të madh ndeshjesh mes ekipeve të mëdha, pa përjashtuar kombëtaret më të vogla, të cilat do të kishin ende mundësi për të garuar në fazat e kualifikueseve. Për UEFA-n, ky model synon të ruajë barazinë sportive, por njëkohësisht të ofrojë përballje më të forta, më të ndjekura dhe me interes më të madh mediatik.

Nga ana tjetër, ndryshimi i formatit do të kishte ndikim të rëndësishëm edhe në aspektin ekonomik. Një kalendar me ndeshje më tërheqëse do të rriste vlerën e të drejtave televizive dhe të kontratave të sponsorizimit, duke sjellë përfitime financiare për federatat kombëtare dhe për vetë UEFA-n.

Megjithatë, çdo reformë e tillë nuk pritet të hyjë në fuqi menjëherë. Sipas raportimeve, çdo ndryshim i mundshëm do të zbatohej vetëm pas vitit 2028, kur skadojnë kontratat aktuale televizive dhe komerciale të UEFA-s për ciklin e ardhshëm të kompeticioneve.

Nëse miratohet, formati i ri do të shënonte një ndryshim të rëndësishëm në mënyrën si zhvillohen kualifikimet për turnetë ndërkombëtarë, duke synuar një futboll më konkurrues, më të ekuilibruar dhe ekonomikisht më të qëndrueshëm për të gjitha vendet anëtare të UEFA-s.