Dëmtohet Pulisic, probleme te Milan-i

15 Tetor 2025, 15:12, Sport CNA

Milan-i po përballet me një periudhë të komplikuar, pasi javët e fundit kanë sjellë disa dëmtime që kanë vënë në vështirësi trajnerin Masimilliano Allegri. Gjatë grumbullimeve me kombëtaret, disa nga lojtarët kryesorë të kuqezinjve kanë pësuar probleme fizike që pritet të ndikojnë drejtpërdrejt në përgatitjet e skuadrës për ndeshjet e ardhshme.

Së pari, Saelemaekers është detyruar të braktisë grumbullimin me Belgjikën pas një dëmtimi që do ta mbajë jashtë fushave për të paktën dy javë. Rafael Leao, i cili ishte grumbulluar me Portugalinë, është rikthyer në Itali pasi ende nuk është në gjendje të luajë. Sulmuesi portugez nuk ka rikuperuar plotësisht nga problemet muskulare dhe stafi teknik po e monitoron me kujdes për të kuptuar nëse do të mund të jetë gati për ndeshjen ndaj Fiorentinës.

Ndërkohë, Christian Pulisic, golashënuesi më i mirë i Milan-it në këtë fillim sezoni, ka shtuar shqetësimet në klub. Ai u largua pas vetëm tridhjetë minutash loje në miqësoren mes Shteteve të Bashkuara dhe Australisë, për shkak të një shqetësimi në bicipsin femoral. Trajneri i kombëtares amerikane, Mauricio Pochettino, deklaroi se lojtari ndjeu një tendosje muskulare dhe u zëvendësua për arsye parandaluese. Pulisiç do të udhëtojë drejt Italisë për të kryer kontrollet mjekësore dhe vetëm pas vlerësimeve do të përcaktohet shkalla e dëmtimit të tij.

Në kampin kuqezi ka ende shpresë që bëhet fjalë për një problem të lehtë, pasi lojtari u largua në kohë nga fusha për të mos e rënduar situatën. Megjithatë, alarmi mbetet, pasi kalendari i Milanit është tejet i ngjeshur dhe përfshin disa sfida vendimtare për ecurinë e sezonit. Pas ndeshjes me Fiorentinën, skuadra do të përballet me Atalantën, Romën, Parmën dhe Interin, takime që mund të ndikojnë ndjeshëm në objektivat e kampionatit.

Në këto kushte, Allegri duhet të mendojë zgjidhje alternative për formacionin. Gimenez është në gjendje të mirë fizike dhe pritet të jetë titullar. Nkunku, që vjen pas një paraqitjeje pozitive dhe një goli me Francën, shihet si një opsion konkret për ofensivën. Për Leao do të vendoset në ditët e ardhshme, pasi ai ende nuk ka ritmin e duhur për 90 minuta. Një nga mundësitë që po shqyrton stafi është përdorimi i Ruben Loftus-Cheek si sulmues i dytë, një rol që e ka mbuluar në disa ndeshje këtë sezon.

Fillimisht, Allegri kishte menduar të vijonte me sistemin 3-5-2, por mungesat e shumta mund ta çojnë drejt një formacioni më fleksibël si 4-3-3. Vendimet përfundimtare do të merren sapo të gjithë lojtarët të rikthehen në Milano dhe të kryejnë kontrollet mjekësore përkatëse.