web counter
LEXO PA REKLAMA!

SHKARKO APP

App Store
Google Play

E fundit!

x

Botërori i Katarit nxori në pah ndarjen e botës në veri dhe jug

20 Dhjetor 2022, 09:28, Sport CNA

Botërori i Katarit nxori në pah ndarjen e botës në veri dhe

Kur të vijë momenti për të bërë një bilanc, Katari duhet t’i shtrojë vetes një pyetje: A ia vlejtën 300 miliardë dollarët e investuar në Kupën e Botës? Nga këndvështrimi i Doha-s, përgjigjja duhet të jetë domosdoshmërisht pozitive, dhe kjo për disa arsye.

Deri para një muaji, në prag të turneut të madh, ky vlerësim ishte gjithsesi i dukshëm. Pati shumë polemika për shkak të mijëra punëtorëve emigrantë që vdiqën në kantieret e ndërtimit, ajrit të kondicionuar nëpër stadiume që shkaktoi jo pak probleme shëndetësore për tifozët dhe lojtarët, homofobisë mbizotëruese dhe abuzimeve me të drejtat e njeriut në këtë Emirat pranë Vëllazërisë Myslimane.

Debati ishte i thjeshtë: Të bojkotohej apo jo ky kompeticion madhor? Fillimi i turneut i kapërceu ambiciet e bojkotit, veçanërisht në Francë, pasi ‘Blutë’ filluan që të fitonin radhazi ndeshjet e tyre. Por debati ka zbuluar sërish një ndarje të botës në dy kampe, të cilat mund t’i tregojmë skematikisht si Veri dhe Jug.

Krenaria e përbashkët

Në fakt bojkoti u diskutua vetëm në hemisferën veriore. Në këtë rast shohim një përçarje që është shfaqur edhe në lidhje me luftën në Ukrainë. Një pjesë e “jugut global” është lodhur nga mësimet morale të vendeve të veriut global, mes të tjerash edhe vendeve ish-kolonizatore.

Këtu po shtoj një përshtypje personale: madje edhe kur kanë të drejtë! Sigurisht, gjithçka për të cilat është akuzuar Katari është e vërtetë, por një pjesë e botës në zhvillim, duke filluar nga Lindja e Mesme dhe Magrebi, ka reaguar ndryshe.

Këto vende ndanë para së gjithash krenarinë për të parë një nga ngjarjet më të njohura në botë, të organizuar nga një shtet me të cilin ata ndihen të ngjashëm. E njëjta ndjenjë është shfaqur edhe në mbështetjen e dhënë për kombëtaren e Marokut në ecurinë e saj të jashtëzakonshme në këtë Botëror.

Një pjesë e jugut nuk donte të mbante anë, pavarësisht shkeljeve flagrante të Kartës së OKB-së nga Rusia.

Afrika e Jugut apo Brazili kanë organizuar tashmë një Kupë Bote. Por fakt është se vendet jugore ndihen gjithmonë se nuk janë të legjitimuar. Nga kjo ndjesi buron edhe acarimi kur i kërkohet të bëhen pjesë e një politike të caktuar. E njëjta gjë ndodhi me luftën në Ukrainë: një pjesë e jugut nuk donte të mbante anën, pavarësisht shkeljeve flagrante të Kartës së OKB-së nga Rusia.

Këtyre vendeve u kanë ardhur më majë të hundës urdhrat e Perëndimit, edhe kur ato janë të justifikuara. Katari ka përfituar nga një lloj kapitali simpatie, si për cilësinë e organizimit të këtij aktiviteti, ashtu edhe për armiqësinë e një pjese të opinionit publik perëndimor.

Megjithatë, pasi të jetë shpallur ky parim, ne nuk duhet ta lëmë veten të gënjehemi. Katari ka shpenzuar shumë para për marrëdhëniet e tij me publikun. Nga ana tjetër ky është një specialitet vendas. Doha ka vepruar mbi të gjitha duke blerë influencë politike, siç tregohet nga “Qatargate” që përfshiu së fundmi Parlamentin Europian.

Nga ky këndvështrim, disa burime besojnë se rrjedhjet e informacionit që janë në origjinë të këtij skandali janë vepër e vendeve rivale të Gjirit Persik, xheloze për suksesin e Katarit.

Nuk mund të përjashtohet si mundësi. Por çfarë do të mbetet nga kjo përvojë për Katarin? Emirati shumë i pasur që prodhon gaz dhe naftë, ka kultivuar “fuqinë e butë” për 30 vitet e fundit, dhe kjo i jep mundësinë që të konkurrojë me vendet më të mëdha dhe më të fuqishme.

Krijimi i televizionit "Al Jazeera", muzetë e mëdhenj dhe Davosi-n e shkretëtirës, shkojnë që të gjitha në funksion të kësaj strategjie. Kupa e Botës së këtij viti i shtohet listës së gjatë të arritjeve. Por thënë këtë, Katari duhet të shmangë arrogancën e popullaritetit të nxitur nga pasuria, sepse mbetet pashmangshmërisht i brishtë.

Përkthyer nga CNA.al





Lajmet e fundit nga