Armand Duka analizon Europianin/ Nga Silvinjo te premiot, presidenti i FSHF: Duhet të kishim kaluar grupin

27 Qershor 2024, 10:53, Sport CNA

Armand Duka analizon Europianin/ Nga Silvinjo te premiot, presidenti i FSHF:

Presidenti i Federatës Shqiptare të Futbollit, Armand Duka, mendon se Shqipëria duhet ta kishte kaluar grupin e Europianit.

Në emisionin “Kampionët” në Tv Klan, numri 1 i qeverisë së futbollit në vend, deklaroi se gjatë kësaj periudhe, emocionet kanë qenë shumë të mëdha, ndërsa veçoi nga ndeshjet e tjera, atë me Kroacinë.

Duke theksoi se emocionet e përballjes me kombëtaren kroate, nuk i ka përjetuar asnjëherë në jetën e tij.

“Me më shumë zgjuarsi, apo me më pak emocion mund dhe duhet ta kishim kaluar grupin edhe pse kishim në “grupin e vdekjes” siç u etiketua. Emocionet këtë periudhë kanë qenë shkatërruese. Sidomos ndeshjen me Kroacinë, kam menduar se nuk do të shkoj deri në minutën e 90, kështu që imagjino ato tjerët që kanë qenë në fushë. Më shumë emocione se tek ajo ndeshje nuk kam ndjerë asnjëherë në jetën time sepse ishim 1-0, shkonim pranë golit dhe duke e ditur atë teorinë e futbollit që nëse nuk shënon do të pësosh, ajo ma shtonte më shumë ankthin, emocionin dhe faktikisht ndodhi që ata shënuan dy herë. Pastaj ekipi tregoi shumë karakter që e barazoi dhe mund ta përmbyste atë rezultat. Emocioni kryesor ka qenë në atë ndeshje, por Europiani ka shumë emocion dhe prandaj thuhet që duhet eksperiencë. Pikërisht kjo është eksperienca që të menaxhosh emocionet.”, u shpreh Duka.

Presidenti i FSHF, zbuloi edhe arsyen e deklaratave optimiste para Europianit, për të cilat tha se dëshironte që të injektonte besimin te skuadra për një rezultat pozitiv. Duka tha se e njëjta gjë do të bëhet edhe nëse ekipi shkon në Botëror.

“Në disa intervista për mediat italiane, kam thënë që fiton Shqipëria ndaj Italisë dhe të dyja kalojmë grupin. Nuk kam menduar lehtësisht se do të kalojmë grupin. Shumë mirë që keni besuar, sepse keni parë ndeshjen me emocion dhe pritshmëri. Jemi munduar ta injektojmë këtë besim te skuadra ndaj Spanjës. Nuk e injektuam dot, siç kishte bërë Gjeorgjia. Kur të shkojmë në Botëror, ne prap do themi që luajmë për fitore. Ky është objektivi. Të gjithë ata që janë rreth kombëtares, duhet të injektojnë besimin për fitore.”, deklaroi ai.

Një nga temat më të nxehta në Kombëtare, është e ardhmja e trajnerit Silvinjo, kontrata e të cilit ka përfunduar. Duka tregoi se teknikut brazilian i është ofruar kontrata që në muajin janar, por pritet të zgjidhet gjithçka para finales së Europianit.

“Kontrata me trajnerin ka mbaruar pas Europianit. Ne i kemi propozuar rinovimin që në janar. Besoj se tani së shpejti do e finalizojmë. Ne kemi pasur biseda. Secili njeri mendon për veten e tij. Nëse i vjen një shifër marramendëse, edhe mund të shkojë. Kontrata është e përfunduar kur e firmos në letër. Gjasat që të rinovojë, sigurisht që është mbi 50%. Ne bëjmë aq sa mundemi për ta mbajtur, nuk mund të bëjmë më shumë se kaq.

Në karrigen time, duhet të mendosh të gjitha gjërat. Dëshira për ta pasur është aq e madhe, sa ia kemi bërë që në janar ofertën për rinovim. Mbrëmë bëmë një festë të vogël me stafin. Silvinjo iku të pushojë dhe do të rikthehet për të vendosur për të ardhmen. Do vendosim para se të përfundojë Europiani. Do shkojmë ta shikojmë finalen bashkë. Nëse del një klub i La Ligës dhe i jep 5 milionë euro, e ka hallall. Mancini la Italinë, për lekët. Silvinjo si trajneri i Shqipërisë ka fat sepse ka vetëm 10 milion shqiptarë që mendojnë se janë trajnerë. Ai i Brazilit ose një tjetër është më pafat.”

Në fund, kreu i futbollit, theksoi se do të ketë një premio për lojtarët, për barazimin e arritur në Europian, ndërsa zbuloi edhe arkëtimet.

“Kur humbet nuk ka premio, por padyshim për një ndeshje të barazuar mund të ketë. E thashë tani. Të ardhurat nga Europiani janë 9.25 milionë euro. Ka edhe të ardhura nga barazimi, por shpenzimet e Europianit janë më të mëdha.”, u shpreh Armand Duka.