Shqipëria "në shkëmbim"/ Të huajt shtohen, shqiptarët ikin

28 Maj 2026, 09:52, Sociale CNA

Statistikat e INSTAT për muajin prill shpalosin një Shqipëri në lëvizje të vazhdueshme, ku shifrat konfirmojnë se vendi ynë po shërben si një pikëtakim gjithnjë e më i frekuentuar ndërkombëtarisht, ndërsa qytetarët vendas vijojnë të largohen.

Gjatë prillit territori shqiptar regjistroi gjithsej 1.617.841 hyrje një rritje prej 8,8 % krahasuar me të njëjtën periudhë të një viti më parë. Nga ky total 891.414 janë shtetas të huaj. Në kahun tjetër dinamika e lëvizjeve të shqiptarëve mbetet shqetësuese, pasi në prill u regjistruan 742.088 dalje të shtetasve shqiptarë, një rritje prej 8,5 % krahasuar me prillin e vitit 2025.

Harta e lëvizjeve tregon se Shqipëria mbetet një destinacion thuajse ekskluziv i vizitorëve evropianë. Nga 891.414 shtetasit e huaj që hynë në vend, pjesa dërrmuese vijnë nga kontinenti ynë. Evropa Jugore kryeson listën me 621.463 hyrje, e ndjekur nga Evropa Perëndimore me 95.773 hyrje dhe Evropa Veriore me 46.256 hyrje. Këto shifra dëshmojnë se interesi për vendin tonë është përqendruar kryesisht te tregjet tradicionale kontinentale.

Ndonëse 98% e të huajve deklarojnë se vijnë për motive personale apo turizëm, prania e tyre e shtuar është bërë faktor i dukshëm në ekonominë vendase. Ky fluks i lartë vizitorësh i kombinuar me kërkesën për akomodim ka ndikuar drejtpërdrejt në tregun e pasurive të paluajtshme, duke ushtruar presion mbi çmimet e qirave dhe të blerjeve, çka shpesh e bën jetesën më të vështirë për qytetarët vendas.

Nga ana tjetër tregu i punës po përjeton një transformim. Ndërkohë që largimi i fuqisë punëtore shqiptare krijon zbrazëti në sektorë kyçë, sektori privat po gjen gjithnjë e më shumë hapësirë për të integruar krah pune të huaj. Ky fenomen nuk është më thjesht çështje statistikash turistike, por një ndërthurje mes dëshirës për të vizituar Shqipërinë dhe nevojës së tregut për të kompensuar shpopullimin e forcës sonë prodhuese.

Shifrat e INSTAT dëshmojnë se ekonomia e vendit tonë ndodhet në një fazë që po përpiqet t’u përgjigjet dy realiteteve, nga njëra anë nevojës për të menaxhuar fluksin e madh të të huajve që sjellin konsum dhe nga ana tjetër sfidës për të mbajtur në vend qytetarët shqiptarë, të cilët po ndjejnë gjithnjë e më shumë peshën e kostove të shtuara të jetesës në shtëpinë e tyre. /CNA