Djegia e banesës në Maliq/ Familjarët: Nuk kemi mundësi ekonomike, shteti të na ndihmojë

1 Shkurt 2026, 11:41, Sociale CNA

Një banesë dy-katëshe është përfshirë nga flakët gjatë orëve të para të mëngjesit në fshatin Zvezdë të Bashkisë Maliq. Fatmirësisht, anëtarët e familjes kanë arritur të dalin në kohë nga banesa, pa pësuar lëndime.

Familjarët tregojnë se në banesë jetojnë shtatë persona, por në momentin e ngjarjes ndodheshin vetëm katër. Ata thonë se nuk kanë mundësi ekonomike për ta rindërtuar shtëpinë dhe apelojnë për ndihmë nga institucionet.

"Djali ishte në gjumë, ne ishim nga kuzhina. Nisi në katin e dytë zjarri, nuk kishim asgjë të ndezur. Është djegur komplet kati i dytë. Jemi 7 pjesëtarë, por në momentin që ndodhi zjarri ishim 4 veta në banesë. Nuk kemi mundësi ta rindërtojmë, na u dogjën të gjitha, shteti të na ndihmojë sa mundet",-tregon një nga familjarët.

Djegia e banesës në Maliq/ Familjarët: Nuk kemi mundësi

Edhe të afërmit dhe fqinjët konfirmojnë se familja është në kushte të vështira ekonomike, pa të ardhura të qëndrueshme, dhe se shtëpia ishte e vjetër me linja elektrike të amortizuara. Ata kërkojnë ndihmë nga bashkia e Maliqit dhe strukturat përkatëse, qoftë për strehim, ushqime apo veshmbathje.

"Unë e kam vëlla dhe tani e mora vesh, se më thanë që u dogj shtëpia, u dogj nga korenti, shtëpia ishte e kompletuar. Kanë punuar 6 muaj vetëm për shtëpinë, nuk kanë mundësi ta rindërtojnë, ndaj duam një ndihmë nga Bashkia e Maliqit. Nuk kanë të ardhura, shkojnë 3 muaj në fshatin Argos dhe marin ndonjë gjë futin në shtëpi, tani ku do gjejnë ata. Duam ndonjë ndihmë, ndonjë rrobë, ndonjë gjë ta ndihmojë komuna. Është familje hallexhinj, jemi romë, nuk jemi të pasur. Zjarri ka ardhur nga korenti, stofën e kanë këtu në kuzhinë, zjarri nisi në katin lart. E morën vesh pasi i lajmëroi një fqinj. Ne kur na thanë i mori zjarr shtëpia, dolëm e pamë flaka ishte në tavan. etojnë 4 anëtarë të familjes, kryefamiljari me djalin dhe nusen dhe djali i tyre. Nuk kanë të ardhura, vetëm me pensionin e tij jetojmë dhe ata shkojnë punojnë në Greqi, ato që marrin i hanë dhe kaq. Duhet t'i ndihmojnë. Ai do bënte çatinë sivjet, të shkonte të punonte edhe këtë vit që të bënte çatinë. Linjat janë të dobëta, shtëpitë e vjetra",- tregojnë të afërmit.

Autoritetet po vijojnë verifikimet për të përcaktuar shkaqet e sakta të zjarrit, ndërsa familja ka mbetur pa strehë dhe ka nevojë për ndihmë urgjente./CNA