E fundit!

09:23 Aktualitet

Shqipëria avancon në negociatat me BE-në, sot hap i ri drejt integrimit europian

Shqipëria shënon një tjetër moment të rëndësishëm në rrugë...

Bllokimi i aksit në juglindje, pengesë për ambulancat/ Vonesa dhe rrezik për jetën e pacientëve

28 Shkurt 2026, 14:00, Sociale CNA

Bllokimi i aksit kryesor Librazhd-Përrenjas ka detyruar qarkullimin e mjeteve drejt rrugës alternative Maliq-Lozhan-Strelcë-Gramsh, një segment që sipas qytetarëve po kthehet në një problem serioz, veçanërisht për shërbimin shëndetësor dhe lëvizjen e ambulancave nga Korça drejt spitaleve rajonale dhe atyre në kryeqytet.

Banorët thonë se rruga është në gjendje të amortizuar, me kthesa të forta dhe segmente të dëmtuara, çka e zgjat ndjeshëm kohën e udhëtimit. Për familjarët që transportojnë të sëmurë në gjendje të rëndë, situata bëhet edhe më dramatike.

“Rruga është e keqe. Unë kam ardhur nga Tirana pardje, kam shkuar në Librazhd nga fshatrat andej. Kishim një të sëmurë me paralizë, e nxorëm nga spitali dhe e shtrimë atje. Çfarë të të them? Çfarë kemi hequr. Situatë shumë e vështirë dhe është e pazgjidhshme, për 2-3 muaj jo njëherë. Ata që janë në gjendje të rëndë… le të vdesin, të shpëtojnë, s’ka rrugë tjetër”,-tregon një qytetar.

Qytetarët theksojnë se ky nuk është thjesht një shqetësim lokal, por prek gjithë jugun e vendit, pasi aksi konsiderohet jetik për lidhjen me pjesën tjetër të Shqipërisë.

“Rruga është kryesorja, se është gjithë jugu i Shqipërisë. S’është se u bllokua një apo dy. Çfarë të mendoj? Të vdekur i quaj”,-thotë një qytetar.

Sipas tyre, nëse më parë udhëtimi drejt Elbasanit zgjaste rreth dy orë, tani përmes Lozhanit dhe Moglicës koha shtohet ndjeshëm, duke shkuar deri në tri orë. Kjo vonesë ndikon drejtpërdrejt edhe tek ambulancat që transportojnë pacientë drejt spitaleve më të specializuara.

“Me vonesë rruga këtu. Nëse më parë ikje për 2 orë në Elbasan, tani i bie nga Lozhani e Moglica dhe vonon më shumë. Ambulancës mbase ia hapin rrugën që të ikë më shpejt, por edhe 3 orë i merr rruga”,-shprehen qytetarët.

Banorët kërkojnë ndërhyrje të menjëhershme nga institucionet përgjegjëse për përmirësimin e segmentit alternativ, duke theksuar se çdo minutë vonese mund të jetë vendimtare për jetën e pacientëve që transportohen me urgjencë. Deri atëherë, rruga Maliq-Lozhan-Strelcë-Gramsh mbetet një sfidë e përditshme për qytetarët dhe shërbimet e emergjencës./CNA