Terapia me ujë të ftohtë mund të shkaktojë më shumë dëme sesa të bëjë mirë

13 Maj 2023, 12:25, Shëndeti CNA

Terapia me ujë të ftohtë mund të shkaktojë më

Foto ilustruese

Zhytja në ujë të ftohtë është padyshim një aktivitet që i ndan njerëzit. Disa e duan, të tjerë e urrejnë. Por shumë njerëz e praktikojnë tani çdo javë apo edhe çdo ditë, me besimin se i bën mirë shëndetit të tyre mendor dhe fizik. Terapia me ujë të ftohtë, mund të marrë formën e notit në natyrë - në liqene, lumenj apo det - dusheve të ftohtë, apo edhe banjave me kuba akulli.

Ajo është përdorur dhe përdoret nga sportistët si një mënyrë për të reduktuar dhimbjen e muskujve dhe për të përshpejtuar kohën e rikuperimit nga dëmtimet. Ata qëndrojnë zakonisht rreth 10 minuta pas stërvitjes në ujë të ftohtë me temperatura 10-15 °C.

Gjithashtu, uji i ftohtë është përdorur për të ndihmuar në trajtimin e simptomave të depresionit, dhimbjes dhe migrenës. Në fakt, ka shumë histori sesi terapia me ujë të ftohtë ka ndryshuar jetën e shumë njerëzve, sesi ka përmirësuar sistemin e tyre kardiovaskular apo edhe njerëzit në kohë të vështira.

Ndërsa shumë studime kanë treguar përfitimet e lidhura me banjot me akull dhe rikuperimin pas stërvitjes, një studim i vitit 2014 zbuloi se këtu mund të ketë një efekt placebo. Pra zhytja në ujë të ftohtë mund të ketë efekte potencialisht të dëmshme në trupin e njeriut.

Terapia me ujë të ftohtë mund të shkaktojë më

Për momentin, nuk janë të disponueshme faktet shkencore që ta mbështetin plotësisht ujin e ftohtë si një terapi. Për më tepër nuk dihet ende nëse ka një kohëzgjatje apo temperaturë të caktuar që funksionon më mirë se të tjerat. Por ajo që dimë, është se më pak qëndrim në ujë të ftohtë është padyshim një mënyrë e sigurt për të mos dëmtuar veten.

Duket se kur flitet për terapinë me ujë të ftohtë, dushet dhe banjat janë një opsion më pak i rrezikshëm, sepse keni një kontroll më të madh për sa i përket temperaturës dhe kohës së ekspozimit në krahasim me ujin në mjedise të hapura. Por për shkak të temperaturave më të ftohta dushet dhe banjat me akull paraqesin ende rreziqe të konsiderueshme.

Një nga problemet më pak të njohura që lidhet me zhytjen në ujë të ftohtë, është ajo që njihet si dëmtim i ftohtë pa ngrirje. Kur jemi të ekspozuar ndaj të ftohtit, është normale që duart dhe këmbët të ndihen shumë të ftohta apo të mpira, dhe mund të kenë ndjesi shpimi gjilpërash ose të jenë të dhimbshme gjatë ri-ngrohjes.

Për shumicën e njerëzve, këto simptoma janë kalimtare, me ndjesi normale që largohen brenda pak minutash. Por për ata me lëndime të ndryshme, këto simptoma (dhimbje, ndjesi e ndryshuar dhe ndjeshmëri ndaj të ftohtit) mund të vazhdojnë në zonat e prekura për shumë vite për shkak të dëmtimit të nervit dhe enëve të gjakut.

Ndërkohë ekzistojnë gjithashtu shumë ndryshime në mënyrën se si trupat tanë individualë reagojnë ndaj ftohjes. Për shembull, ata me prejardhje afrikane dhe të Karaibeve, duket se janë më të ndjeshëm ndaj lëndimeve të ftohta pa ngrirje.

Terapia me ujë të ftohtë mund të shkaktojë më

Ndaj rreziqet nga ekspozimi ndaj të ftohtit do të ndryshojnë midis njerëzve të ndryshëm. Megjithatë, një studim i vitit 2020 me notarët e ujërave të ftohtë tregoi se megjithëse mund të kenë ndjeshmëri ndaj të ftohtit, kjo nuk u shoqërua me dëmtimin e enëve të gjakut në lëkurë.

Pra, nëse doni të t’i nënshtroheni një terapie me ujë të ftohtë, ja cilat janë gjërat që duhet të keni parasysh:

Konsultohuni paraprakisht me mjekun tuaj për t’u siguruar se është e sigurt për ju.

Sigurohuni që të mos jeni vetëm dhe që uji të jetë i sigurt, sidomos kur hyni në lum, liqen apo det, ku duhen marrë parasysh baticat, rrymat, dhe dallgët, pengesat nënujore etj.

Planifikoni se si do të hyni dhe do të dilni nga uji në mënyrë të sigurt (mos harroni se muskujt tuaj nuk do të funksionojnë aq mirë kur jeni të ftohtë dhe mund të mos jeni në gjendje të ndiheni me duar dhe këmbë).

Sigurohuni që të keni peshqir, rroba të thata, rezistente ndaj erës, një pije të ngrohtë dhe një vend për t'u strehuar. Mos vozitni me varkë dhe mos ngisni biçikletën derisa të jeni ngrohur plotësisht. Qëndroni në ujë të ftohtë vetëm për një periudhë të shkurtër kohe, dilni jashtë para se të përjetoni mpirje, dhimbje apo dridhje./ Përkthyer dhe pështatur nga CNA.al