Si të përballoni virozat

13 Janar 2024, 15:12, Shëndeti Ilir Allkja

Në takime direkt apo telefonata plot miq, të afërt e pacientë më thonë se këto kanë kaluar një ftohje apo të rëndë, si kurrë më parë, por a duhet të frikësohemi.

Dimri shpesh ka ndikim në shëndetin tonë, personalisht rrallë kam kaluar dimër pa shqetësime.

Për shkak të motit të ftohtë ne kalojmë më shumë kohë në ambiente të mbyllura. Jemi të ekspozuar ndaj njëri-tjetrit në mjedise të mbyllura.

Ajri që thithim nxehet nga kondicionerët, kaloriferët, sobat të cilat e thajnë atë.

Ekspozimi ynë ndaj pluhurit dhe grimcave të mykut dhe ndotësve të tjerë të brendshëm rritet.

Në momentin që dalim jashtë ajri është i ftohtë e me lagështirë! Rrallë individë ia dalin të mos preken nga këto ndryshime drastike!

Jeta jonë rrjedh me ritme të shpejta, ne nuk kemi kohë për të toleruar një sëmundje që na kufizon punën, aktivitetin.

Ne mendojmë se një forcë e jashtme na ka sulmuar. Ne kërkojmë një ilaç për ta nxjerrë jashtë!!

Shpesh telefonojmë një mjek, i tregojmë ankesat e ai na jep një antibiotik.

Është momenti që të gjithë besojmë se jemi në rrugën drejt shërimit. Nëse antibiotiku i parë dështon, ka gjithmonë një të dytë ose një kombinim antibiotikësh!

Një mjek pa njohuritë e duhura ju thotë shpesh se antibiotiku i mëparshëm nuk ka funksionuar.

Fakt: në më shumë se gjysmën e rasteve të infeksioneve të sistemit të frymëmarrjes një antibiotik është i padobishëm.

Antibiotikët janë krijuar për të luftuar bakteret dhe nuk ndihmojnë kur shkaku i infeksionit është një virus.

Është e vështirë të përcaktohet nëse ndonjë grup simptomash përfaqëson një infeksion viral apo një infeksion bakterial. (Sidomos nëpërmjet telefonit).

Unë e kam theksuar shpesh që është e rëndësishme të ekzaminohet një pacient përpara se të fillohet një antibiotik.

Përdorimi i tepërt i antibiotikëve ka rritur rezistencën ndaj antibiotikëve, kështu në një moment që ata do na duhen nuk do japin rezultat.

Përdorimi i antibiotikëve kur nuk është i nevojshëm është i rrezikshëm.

Fatkeqësisht sot plot pacientë kërkojnë vetë në farmaci antibiotikë! Ky fakt është tmerrues!!

Ka strategji të arsyeshme për të menaxhuar simptomat e infeksioneve të hershme të traktit respirator pa përdorur dozën e panevojshme të antibiotikëve.

Strategjitë që reduktojnë ekspozimin ndaj faktorëve e substancave irrituese përfshijnë:

Shmangia e situatave ku ekspozimi ndaj personave të tjerë të infektuar është i mundshëm. Që nga fëmijëria mbaj mend që kur na vinte në shtëpi dikush me kollë e temperaturë, sëmureshim edhe ne, pak ditë më vonë.

Ajrosja e ambienteve të shtëpisë dhe të punës mund të jetë një strategji parandaluese shumë efektive. Është më i shëndetshëm një ambjent me ajër të ftohtë e të pastër sesa një ambient me ajër të ngrohtë por të ngarkuar, me faktorë që sjellin sëmundje.

Mos merrni asnjëherë antibiotikë nga farmacisti pa vizitë mjekësore. Kërkoni nga mjeku shpjegime për arsyet që po ju jepantibiotikë!

Trupi juaj duhet trajtuar si tempull, mos bini pre e industrisë farmaceutike, e cila mund të jetë kundër shëndetit tuaj në disa raste.