"Vuani nga 'sindroma e Stokholmit'"/ Balla-opozitës: Nga kjo protestë s’do të lindë dot një PD e re

30 Qershor 2026, 12:42, Politikë CNA

"Vuani nga 'sindroma e Stokholmit'"/ Balla-opozitës:

Kreu i Grupit Parlamentar të PS-së, Taulant Balla, foli në Kuvend lidhur me protestat që po zhvillohen prej një muaji para Kryeministrisë.

Duke iu drejtuar opozitës, Balla u shpreh se vuajnë nga sindroma e Stokholmit, pasi, sipas tij, qytetarët u morën sheshin demokratëve dhe tani këta të fundit duan të bashkohen me ta.

Më tej ironizoi deputetët e PD-së, duke thënë se disa prej tyre gëzohen kur dëgjojnë thirrjet “Berisha në burg”, se e shohin tubimin si shpëtimin e vetëm nga Sali Berisha.

“Ju kam thënë një javë më parë në këtë sallë, do t'jua them edhe sot. Mua më duket se ju po vuani nga sindroma e Stokholmit. Ju kanë marrë sheshin dhe meqë jua kanë marrë, doni që të bashkoheni me ata që jua kanë marrë sheshin, edhe pse ata ju anatemojnë udhëheqësin. Dëgjova deputetin tuaj, që në një lojë fjalësh për forcat politike ra në kurthin e harresës mbi faktin që sot në krye të PD-së është një sekretar partie. I vetmi sekretar partie në krye të një partie në Shqipëri. Edhe varkëtari i varkës së diktatorit Enver Hoxha, që gëzohej kur i jepte dorën.

Shumë nga ju gëzoni kur dëgjoni thirrjet “Berisha në burg”, se e shihni si shpëtimin e vetëm nga Saliu. Ka mes jush që doni të shpëtoni nga Saliu, thoni “inshalla na e heq protesta Saliun”. Një gjë protesta ia arriti, ju protesta ju mundi, ne protesta nuk na mund dot. PS-në nuk e mund dot askush. Ju jeni të gatshëm për të duruar këdo, mjafton të jetë kundër nesh. Pse i sulmoni protestuesit rreth e rrotull? Transparenca është gjëja më e mirë”, u shpreh ai.

Ndër të tjera, Balla u shpreh sërish se Dritan Goxhaj nuk ka asnjë ditë në Ushtrinë Çlirimtare të Kosovës.

Ai shtoi se një dokument i vënë në dispozicion nga veteranët e UÇK-së, u tentua të përdoret nga opozita për politikë.

Ndërkohë pati edhe një thirrje për protestuesit që të mos lejojnë t’ju vjedhin protestën.

“U shqetësuat ju për të mbështetur njëfarë Dritan Goxhaj, po ju them që s’ka asnjë ditë në UÇK. Një dokument i vënë në dispozicion nga veteranët e UÇK-së, e morët dhe aq të paudhë jeni, sa u munduat ta përdornit për hesapet politike. U them protestuesve: mos lejoni t’ju vjedhin protestën. Shqipëria u përfshi në një luftë digjitale ndërkombëtare pa qenë objekt real i kësaj.

Regjimi iranian është kokë e këmbë i përfshirë. Ndërsa aktorë të tjerë të huaj po kontribuojnë për të financuar këto lloj luftërash hibride. Në protestë janë përzier motra e vëllezër nga Kosova, Shkupi, që u mobilizuan mes valës së dezinformimit dhe jo përfshirjes së forcave politike, të paktën deri tani. Sindroma e Stokholmit është një sindromë që vështirë shërohet. Mendoni se kjo protestë mund t’ju shpëtojë? E vërteta është e kundërta. PD është në nivelin e saj më të ulët historik. Nëse zgjedhjet janë nesër, PD vjen as me gjysmën e deputetëve që ka sot. Kjo protestë po identifikohet me një protestë që ka në vetvete përpjekjen për të fshehur arsyen pse lindi kjo protestë. Kjo s’bën asnjë punë dhe nuk e shpëton PD-në, edhe sikur në krye të dalë Saliu. Nga kjo protestë s’do të lindë dot një PD e re. Për ne, falë Zotit, PS është parti e re”, tha Balla.