“Të bëjmë një parti të re”/ Zbardhen diskutimet në mbledhjen e grupit të PD-së

11 Tetor 2023, 16:12, Politikë CNA

Foto ilustruese

Partia Demokratike ka zhvilluar një mbledhje me grupin parlamentar ku kanë diskutuar për situatën në të cilën ndodhet partia dhe për alternativat se si mund të zgjidhet ngërçi mes tyre.

Diskutimet që janë bërë në mbledhje janë zbardhur. Deputeti i PD-së, Dashnor Sula ka propozuar që të krijohet një parti e re pasi duke vijuar në këtë situatë, do të pësojnë humbje si në 6 mars po ashtu edhe në 14 maj.

Sipas Sulës, gjendja në PD është në favor të Ramës.

“Ne jemi mbledhur disa here në takime të Grupit Parlamentar, por tashmë ka ardhur koha të flasim për zgjidhje politike të Partisë Demokratike, në mënyrë që të jemi gati për zgjedhjet e 2025-ës. Edi Ramës i intereson të jetë kjo situatë në PD.

Basha sot ka vulën nga gjykata dhe ne nuk mund të qëndrojmë kështu, pasi do të përsërisim veten, si në 6 mars, apo zgjedhjet e 14 majit. Nëse do të vazhdojmë të presim gjykatën, mund të ndodhë, siç ndodhi, që u dha vendimi 1 muaj para zgjedhjeve dhe humbëm komisionerët, logon, vulën.

Sepse de jure, PD është Basha, edhe pse s’ka anëtarësinë me veten, ka një pakicë, ndërkohë që ne vetë duhet të kthehemi në një parti de juro, që të njihemi institucionalisht nga KQZ, parlamenti etj. De facto patjetër që ne jemi Partia Demokratike, jemi shumicë e anëtarësisë, kemi shumicën në Grupin Parlamentar.

Unë propozoj, se nuk është fundi i botës, aq me tepër qe kemi anëtarësinë me vete, që të krijojmë një parti të re, Partinë Demokratike të Rithemeluar. Vetëm kështu mundemi te jemi një alternativë serioze dhe të ngjallim besimin te demokratët”, tha Sula.

Ndërkaq, Sali Berisha është shprehur se nuk mund t’i nënshtrohen një padrejtësie, pasi çdo gjë vendoset siç do Rama.

“Nuk është vështirë të gjejmë emër apo të bëjmë logo. Problemi është se po i nënshtrohemi një padrejtësie. Një njeri që nuk ka lënë padrejtësi pa bërë ndaj nesh. Çdo gjë vendoset siç e do Edi Rama. Nuk të lë. Çfarë kërkon? Te zgjidhim problemet tona padyshim, por ama të përpiqemi të motivojmë njerëzit për të mbrojtur opozitarizmin dhe të drejtat”, tha Berisha./ CNA