web counter
LEXO PA REKLAMA!

SHKARKO APP

App Store
Google Play

E fundit!

x

PS nuk "lëshon" Olta Xhaçkën/ Mandati nuk dërgohet në Kushtetuese

13 Shtator 2024, 08:40, Politikë CNA
PS nuk "lëshon" Olta Xhaçkën/ Mandati nuk
Olta Xhaçka

Për herë të tretë, deputetët e PS-së nuk zbatuan vendimin e Gjykatës Kushtetuese për dërgimin e mandatit të socialistes Olta Xhaçka, për verifikim.

Pas një seance maratonë në Kuvend, 65 ligjvënës socialistë abstenuan, 9 votuan kundër dhe 25 deputetë të opozitës votuan pro.

9 deputetët që votuan kundër ishin Jurgis Çyrbja, Bledi Çuçi, Damian Gjiknuri, Anduel Tahiraj, Paulin Stërkaj, Petro Koçi, Klodiana Spahiu, Shkëlqim Bullari dhe Bujar Çela. Në votim nuk mori pjesë as kryeministri Rama, i cili ishte larguar nga salla.

Sapo përfundoi votimi, opozita përplasi tavolinat, ndërsa e cilësoi një turp vendimin e socialistëve për të mos zbatuar urdhrin e Gjykatës Kushtetuese.

Në përfundim të seancës, kryetarja e Kuvendit, Elisa Spiropali, njoftoi se do t’i drejtohet Komisionit të Venecias për mendim.

Opozita dhe mazhoranca dolën me dy raporte të ndara. Në raportin e Partisë Demokratike, Kuvendit i kërkohej të zbatonte vendimin e Gjykatës Kushtetuese. Ndër të tjera kryetares së Kuvendit i kërkohej të informojë deputetët e Kuvendit të Shqipërisë me detyrimin për të votuar “PRO” dhe të vendosë dërgimin e mandatit të Olta Xhaçkës në Gjykatën Kushtetuese pa vonesa.

Nga ana tjetër, mazhoranca në raportin e saj dukej sikur kishte bërë hapa pas nga qëndrimi i saj i prerë për të mos e çuar në Gjykatën Kushtetuese. Në raport, PS argumentonte se vendimet e Gjykatës Kushtetuese janë të detyrueshme për zbatim, edhe pse në raport nënvizohej se do të jenë deputetët e Kuvendit të Shqipërisë të cilët do të vendosin vetë me votë.

Mandati i Olta Xhaçkës duhet të shqyrtohet pa vonesa në Gjykatën Kushtetuese dhe deputetët janë të detyruar ta dërgojnë atë sa më shpejt, tha Gjykata Kushtetuese në vendimin e marrë më 10 korrik 2024 ku shfuqizoi vendimin e parlamentit, i cili refuzonte dërgimin në këtë gjykatë të mocionit të opozitës për papajtueshmërinë e mandatit të deputetes Olta Xhaçka.

Në muajin prill, socialistët e interpretuan votën e tyre me faktin se pavarësisht se vendimet e Gjykatës Kushtetuese janë të detyrueshme për zbatim, deputetët, sipas Kushtetutës janë të lirë në vendimmarrjen e tyre. Por me vendimin e 10 korrikut iu bë e qartë Kuvendit se nuk mund kurrsesi të vërë në diskutim fuqinë detyruese të vendimeve të saj.

Çështja “Xhaçka” ka nisur që prej qershorit të vitit 2022, kur opozita kërkoi heqjen e mandatit të saj me argumentin se deputetja socialiste është në konflikt interesi për shkak të titullit investitor strategjik që bashkëshorti i saj gëzon me vendim qeverie./ CNA





Lajmet e fundit nga