18-vjetori i ndarjes nga jeta të Ibrahim Rugovës, reagon politika

21 Janar 2024, 13:16, Politikë CNA

Sot shënohen 18 vite nga ndarja nga jeta e Ibrahim Rugovës, ish-presidentit të Kosovës, i cili nuk do të harrohet asnjëherë nga shqiptarët.

Rugova themeloi partinë politike Lidhja Demokratike e Kosovës (LDK) në vitin 1989. LDK-ja kishte mbështetjen e 90% të popullsisë etnike shqiptare të Kosovës dhe ai vetë gjithmonë punoi çdo ditë për pavarësinë e Kosovës me mjete paqësore.

Nuk ka munguar një reagim i kryeministrit Edi Rama për të figurë të shquar.

"18 vite pa Ibrahim Rugovën mes nesh, po edhe 18 arsye më shumë për t’u përulur me nderim përpara këtij monumenti të kujtesës sonë kombëtare", shprehet Rama në një postim në rrjetet sociale.

Ndërkohë ka reaguar edhe kreu i Partisë së Lirisë, Ilir Meta, i cili shprehet: "Në ditën e kalimit të Tij në përjetësi nderojmë me mirënjohje dhe respekt kujtimin dhe veprën e paharruar të Presidentit historik të Kosovës, Ibrahim Rugova.Vizioni euroatlantik i këtij burri të madh shteti për Kosovën e lirë dhe të pavarur, të integruar plotësisht në BE dhe në NATO, për forcimin e paqes dhe bashkëjetesës në rajonin tonë, por edhe modeli i urtësisë dhe largpamësisë që na la trashëgim do të mbeten përherë frymëzim për mbrojtjen e çështjes kombëtare!".

Ndërkohë kryeministri Albin Kurti ka vizituar sot familjen e Presidentit të parë të Kosovës, Ibrahim Rugova. Ai nënvizon se Rugova “e bashkoi popullin e Kosovës kundër okupimit të Serbisë”.

“Sot, 18 vite më parë u nda nga jeta Presidenti Historik i Kosovës, doktor Ibrahim Rugova. Ai e bashkoi popullin e Kosovës kundër okupimit të Serbisë, duke e bërë rezistencën humane dhe humanitetin rezistencë. Në nderim të figurës së tij dhe kontributit të madh për kombin dhe shtetin tonë, bashkë me zëvendëskryeministren Gërvalla dhe ministrin Çeku vizituam familjen Rugova: bashkëshorten Fanë, vajzën Teuta, djemtë Mendimin dhe Ukën me bashkëshortet e tyre Blerinën dhe Blertën”, shkroi Kurti në rrjetet sociale.

Sakaq, presidentja e Kosovës, Vjosa Osmani, tha se Ibrahim Rugova ia kushtoi ?do ditë të jetës së tij lirisë dhe pavarësisë së vendit.

“Presidenti Rugova arriti që në një kohë jashtëzakonisht të vështirë për popullin tonë të ndërtojë aleanca të cilat edhe sot i duhen Kosovës, prandaj sot e përjetë do t’i ruajmë këto aleanca të cilat do të na ndihmojmë që të ecim përpara drejt realizimit të plotë të vizionit të presidentit historik për një Kosovë të pavarur, sovrane, të integruar në BE dhe në NATO dhe në miqësi të përhershme me Shtetet e Bashkuara të Amerikës”, u shpreh Osmani"./CNA