Eduart Grishaj zbulon detaje nga edicioni i 3 i "Ferma VIP": Mund të krahasohet me rajonin

26 Mars 2026, 11:26, Lifestyle CNA

Eduart Grishaj zbulon detaje nga edicioni i 3 i "Ferma VIP": Mund

Nesër nis sezoni i tretë i spektaklit shumëpritur “Ferma VIP”, i drejtuar nga Arbana Osmani në ekranin e "Vizion Plus". Ky edicion vjen me një ambient të transformuar dhe teknologji të avancuar, duke ofruar një përvojë të re për publikun shqiptar.

Regjisori Eduart Grishaj deklaroi se shtëpia e banorëve është katër herë më e madhe, me kamerat që mbulojnë 24 orë çdo hap të tyre.

Ai shtoi se shumica e konkurrentëve janë të njohur për publikun, por shumë prej tyre hyjnë për herë të parë në një reality show.

Një nga ndryshimet kryesore është ambienti: shtëpia nuk ngjan më me një fshat tradicional shqiptar, por është konceptuar si një fshat modern me pishinë luksoze.

Përmbajtja e spektaklit përfshin sfida fizike, punë në fermë dhe aktivitete të ndryshme që do t’u përshtaten të gjithë banorëve.

Opinionistët e këtij sezoni do të jenë Ermal Mamaqi, Einxhel Shkira dhe Armina Mevlani, ndërsa produksioni do të ofrojë transmetim 24 orë dhe dy spektakle në javë, për një total prej 100 ditësh.

Grishaj tha se koordinimi i 158 kamerave dhe realizimi i çdo detaji ka qenë sfida më e madhe, por premton një edicion plot surpriza dhe dinamika të reja për publikun.

“Besoj se ky është maksimumi që mund të bëhet. Nuk krahasohet vetëm me vendin tonë, por me të gjithë rajonin. Çdo gjë ka ndryshuar: nga studioja, ndriçimi e deri te kamerat.

Shtëpia është katër herë më e madhe dhe numri i kamerave që vëzhgojnë 24 orë është shumëfishuar.

Jam shumë i lumtur që producentja Holta Dulaku ma ka bërë punën si “autostradë” që nga fillimi, duke më lejuar të jap maksimumin.

Konkurrentët janë emra shumë të mirë që publiku i njeh, por nuk i ka parë kurrë në dimensionin e vëzhgimit 24 orë.

Shtëpia nuk ngjan më me një fshat tradicional shqiptar, por me një fshat modern në Teksas apo Los Anxhelos. Pellgu i rosave është zëvendësuar me një pishinë të madhe luksoze.

Filozofia e fermës do të jetë një miks: nga mbjellja e tokës dhe punët e stallës, deri te sfidat fizike. Ka konkurrentë shumë të fortë dhe të palestruar, por sfidat do t’u përshtaten të gjithëve.

Kamerat janë të fundit që përdoren edhe në finalet e Botërorit. Me to mund të xhirohet edhe Champions League. Kam dashur të fus një frymë kinematografike në program.

Ermal Mamaqi do të sjellë humorin, Einxhel Shkira analizën e showbiz-it dhe Armina Mevlani eksperiencën e saj.” Ndërsa rolin drejtues: “‘Kryeplaka do të jetë Arbana nga studioja.

Sezoni do të zgjasë 100 ditë, me transmetim 24 orë dhe dy spektakle në javë,” ndërsa në natën e parë “do të hyjnë rreth 24 fermerë”.

Sfida më e madhe për të si regjisor?

“Realizimi i çdo detaji në kohë rekord,” tha ai, duke zbuluar edhe prapaskenat: “Mbrëmë kemi qenë deri në orën 3 të mëngjesit në studio", tha Grishaj.

Ndërsa për natën e parë, pritshmëritë janë maksimale:

“Do të drejtoj 158 kamera nga kabina e pilotimit bashkë me skuadrën time. Do të kemi katër regji në koordinim,” tha Grishaj, duke shtuar me humor: “Shpresojmë që edhe koha të na favorizojë… urojmë që në orën 9:00 të ketë një pauzë sa të fusim banorët brenda.”/ CNA