Zbardhen detaje nga operacioni/ Si u plagos efektivi i "Shqiponjave" në Dibër

4 Mars 2026, 09:55, Kronika CNA

Zbardhen detaje nga operacioni/ Si u plagos efektivi i "Shqiponjave"

Policia e Dibrës ka zbardhur detaje lidhur me operacionin, ku mbeti i plagosur një efekt i forcave “Shqiponja”. Inspektori G.M., pësoi dëmtime trupore pasi u rrëzua nga një mur rrethues gjatë kapjes së shtetasit Klodian Llomi (Mazari), 35 vjeç.

Ky i fundit u vu në pranga pasi ishte shpallur në kërkim për kryerjen e veprave penale “Organizatë kriminale”, “Shfrytëzim prostitucioni” dhe “Trafikim i lëndëve narkotike” në Itali. 35-vjeçari ka për të vuajtur dënimin e mbetur 6 vite, 7 muaj e 2 ditë burg për këto vepra penale.

Ndërkohë bëhet me dije se punonjësi i policisë është transportuar me helikopter në drejtim të Tiranës për ndihmë mjekësore më të specializuar.

Njoftimi i policisë:

Finalizohet operacioni policor i koduar “Vendimi”, për kapjen e një shtetasi të shpallur në kërkim.

Ekzekutohet vendimi i Gjykatës së Apelit për 35 vjeçarin, për vuajtjen e dënimit me 6 vite, 7 muaj e 2 ditë burg të mbetur, për veprat penale “Organizatë kriminale”, “Shfrytëzim prostitucioni” dhe “Trafikim i lëndëve narkotike”, vepra të kryera në Itali.

Në vijim të punës për parandalimin dhe goditjen e paligjshmërisë, si dhe për kapjen e personave të shpallur në kërkim kombëtar dhe ndërkombëtar, bazuar edhe në informacionet e siguruara nga inteligjenca policore për një shtetas të kërkuar, strukturat hetimore të Drejtorisë Vendore të Policisë Dibër, në bashkëpunim me Forcat e Posaçme “Shqiponja” të DVP Dibër, në orët e para të mëngjesit të sotëm, finalizuan me sukses operacionin policor të koduar “Vendimi”.

Si rezultat i veprimeve të shpejta dhe të koordinuara, në Maqellarë u bë kapja dhe arrestimi i shtetasit Klodian Llomi (Mazari)., 35 vjeç, banues në fshatin Kërçisht, Maqellarë.

Ky shtetas ishte shpallur në kërkim, pasi Gjykata e Apelit, ka njohur dënimin e Gjykatës së Apelit të Romës në Itali, ku ka për të vuajtur dënimin e mbetur 6 vite, 7 muaj e 2 ditë burg për veprat penale “Organizatë kriminale”, “Shfrytëzim prostitucioni” dhe “Trafikim i lëndëve narkotike”.

Ndërkohë, gjatë zhvillimit të këtij operacioni, një punonjës policie i Forcës së Posaçme “Shqiponja”, inspektor G.M., gjatë kapjes së personit në kërkim është rrëzuar nga një mur rrethues, duke pësuar dëmtime trupore.

Punonjësi i policisë është transportuar me helikopter në drejtim të Tiranës, për ndihmë mjekësore më të specializuar.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme. /CNA