web counter
LEXO PA REKLAMA!

SHKARKO APP

App Store
Google Play

Thirrja e motrës së Egli Progës/ "Mos e politizoni vrasjen e vëllait tim"

14 Gusht 2024, 22:05, Kronika CNA

Familjarët e 42-vjeçarit Egli Proga kanë bërë një thirrje të fortë në homazhet që janë mbajtur mbrëmjen e kësaj të mërkure në Pogradec.

Babai i viktimës tha se dëshiron vetëm zbardhjen e së vërtetës dhe vënien e drejtësisë.

“Vetëm drejtësi, të dali e vërteta, vetëm kaq kërkojmë”, u shpreh ai.

Nga ana tjetër, motra e Egli Progës, Jonida Proga, kërkoi që vrasja e vëllait të saj të mos politizohet.

“Të dashur miq, të njohur dhe të panjohur, ju falenderoj që jeni këtu, në vendin ku mori frymë për herë të fundit vëllai im Eglantini. Unë jam motra e tij, por që nga dita kur Egli mbeti këtu i pajetë, pasi jetën ia morën barbarët e këtij qyteti, unë do të jem mbrojtësja e tij. Do ta mbroj këtu pas vdekjes, pasi nuk e mbrojta dot për së gjalli.

Shumëkujt mund t’i dukem e vogël, e pafuqishme, e pashpresë apo një hallexheshë me të zeza, por ju betohem juve që jeni këtu apo që fshihen skutave, se drejtësinë do ta sjell me çdo kusht, se ia kam borxh vëllait tim, vetes dhe familjes. Nuk dua të përfitojë askush nga vëllai im, nuk dua të politizohet vdekja e tij, nuk dua të hidhërohet askush më shumë se unë apo familja ime për të. Megjithatë do të pranoj ndihmën e të gjithëve derisa drejtësia të vihet në vend dhe ta shohë edhe vëllai im nga varrezat që ajo u vendos.

Kriminelët që i kanë mbyllur gojën këtij qyteti dhe vëllait tim do të shkojnë në burg të gjithë pa asnjë diskutim, si ata plehra që e dhunuan dhe ia morën shpirtin këtu, si ata të pashpirtët e thjerë që kërkuan ta mbyllin këtë vrasje makabre me heshtje apo me letra.

Kam vetëm një kërkesë për ata që më dëgjojnë sot, për pogradecarët: Flisni! Mos kini frikë! Tregoni të vërtetat tuaja për banditët që morën jetën e Eglit! Dëshmoni se ata mund t’ju vrasin vëllezërit tuaj nëse shpëtojnë paq, tregoni kush i mbron, kush janë kriminelët pas tyre. Kërkoj nga sistemi i drejtësisë, avokatë, prokurorë, gjyqtarë, këtë herë nuk ka para, miq, ndërhyrje. Mos bëni gabim ta godisni me shkelma dhe grushte vëllain tim siç bënë barbarët që do përpiqen t’ju blejnë, kërkoj vetëm drejtësi, por jo vetëm si shprehje, e kërkoj si vepër”, theksoi Jonida Proga./ CNA





Lajmet e fundit nga