web counter
LEXO PA REKLAMA!

SHKARKO APP

App Store
Google Play

E fundit!

x

Seanca për Kurtin/ Avokati: Do të vijojmë të kërkojmë pafajësi

19 Maj 2025, 16:42, Kronika CNA

Seanca për Kurtin/ Avokati: Do të vijojmë të

Në Gjykatën e Shkallës së Parë të Korçës është mbajtur mesditën e sotme seanca për rikualifikimin e veprës penale që rëndon mbi Dritson Kurtin, i cili pas martesës me një të mitur të komunitetit rom, kanë lindur një fëmijë.

Familjarë dhe anëtarë të komunitetit rom kanë protestuar për herë të tretë para gjykatës, duke kërkuar lirimin e Kurtit, për shkak se ky komunitet e ka pjesë të traditës martesën në moshë të vogël. Vetë e mitura dhe babai i saj në një intervistë për mediat kanë kërkuar lirimin e Dritsonit, duke u shprehur se e kanë të pamundur jetesën dhe janë zhytur në borxhe për rritjen e foshnjës.

"Ma lironi burrin. Mua nuk ka kush të më ushqejë siç e kam thënë gjithmonë. S'kam krah pune. Të vështira shumë këto muaj, gjyshja më shumë borxh ka marrë te dyqani që na mban dhe mua dhe fëmijën tim. Dua vetëm të ma lironi. Është protesta e tretë", tha e mitura.

 

"Kemi dëshirë të lirohet. Kemi ligjet e vjetra të gjyshërve tanë, traditat tona të vjetra, sipas tyre kemi ecur dhe ne. Shteti e ka në dorë ta lirojë një orë e më parë. Edhe ne nuk kemi mundësi ta ndihmojmë. Punojmë me hekurishte e me mbeturina, po i rrisim fëmijët. Duam të lirohet, të krijojë familjen e vetë me fëmijët e vetë", u shpreh babai i vajzës së mitur.

Në seancën gjyqësore të mbajtur ditën e sotme, u vendos rikualifikimi i veprës penale nga neni 100/2 në nenin 100/1, si edhe u pranua gjykimi i shkurtuar për ekonomi gjyqësore, ndërsa sipas avokatit Enea Cenko do të vazhdojnë të kërkojnë pafajësi.

"Sot seanca në gjykatën e Korçës shkoi shumë mirë. Deri në këtë moment proçedurial që ne jemi, u kërkua një seancë më parë, rikualifikimi i akuzës neni 100/2 i kodit penal dhe gjykata ishte tërhequr për të marrë vendim. Pranonte rikualifikimin e akuzës. Tashmë në seancën e sotme, në gjykimin paraprak, gjykata e pranoi siç e kërkoi prokuroria nga neni 100/2 në nenin 100/1. U kërkua nga ana jonë pjesa e gjykimit të shkurtuar çka u pranua nga gjykata. Është bërë një punë kolosale për ti krijuar bindjen dhe për ti kërkuar organit të akuzës, rikualifikimin e akuzës. Në seancën e rradhës do dëgjojmë konkluzionet e organit të akuzës. Vajza e mitur, viktima e këtij procesi ka folur duke kërkuar me insistim që bashkëshorti i saj të kthehej në shtëpi dhe të siguronte jetesën. I bëj thirrje të gjitha institucioneve, të marrin një vendim sa më të drejtë duke patur parasysh se ka një konventë speciale për komunitetin rom dhe të shikohet me tepër rigorozitet konventa europiane për romët. Nëse do të ishim tek kualifikimi i parë që bëri prokuroria, Dritson Kurti rrezikonte deri në 25 vite burg. Në këtë moment proçedurial, kemi të bëjmë me një kërkesë për dënim nga 7-15 vite.

Besoj se gjykata do marrë parasysh rrethanat lehtësuese dhe duhet theksuar që është një fakt shumë i rëndësishëm që viktima nuk ka bërë denoncim për këtë person. Tjetër fakt është që në procesin e sotëm, ajo foli çfarë i kërkonte shpirti i saj. Ky është një alarm i madh në rast se ky person do të jetë akoma në këto kushte, do të thotë që shumë anëtarë të komunitetit rom, janë martuar të vegjël dhe sot policia e shtetit të bëjë një plan masash e të arrestojë një pjesë të konsiderueshme të këtij komuniteti. Gjykimi i shkurtuar është kërkuar nga ana jonë për ekonomi gjyqësore dhe deri në fund ne do të këmbëngulim për pafajësi. I bëjmë apel të gjitha institucioneve që të reagojnë për këtë çështje, dhe në veçanti gjykatës, prokurorisë, të shikojne vendimmarrjen me tepër rigorozitet dhe mendoj që do të kete diçka lehtësuese", u shpreh avokati.

Për komunitetin rom, kjo seancë ishte një hap pozitiv për shkak se nga 25 vite që rrezikonte Kurti, tashmë me nenin 100/1 dënimi arrin nga 7-15 vite burgim.

Ndër të tjera, avokati mbrojtës u ka bërë apel organeve ligjzbatuese për të reaguar me rigorozitet ndaj kësaj çështje./ CNA





Lajmet e fundit nga