Planet për vrasje dhe trafiku i drogës/ Zbulohen emrat dhe rolet e të arrestuarve, djali i Erzen Breçanit në kërkim

21 Nëntor 2023, 09:39, Kronika CNA

Planet për vrasje dhe trafiku i drogës/ Zbulohen emrat dhe rolet e

Detaje të reja kanë dalë nga operacioni me urdhër të SPAK-ut, ku është goditur një grup kriminal pas zbërthimit të aplikacionit SKY ECC. Prokuroria e Posaçme ka lëshuar 11 urdhër-arreste në total, ku janë arrestuar 5 persona, 5 të tjerë janë në kërkim dhe ndaj një oficereje është vendosur masa e sigurisë "detyrim paraqitje".

CNA ka siguruar disa nga emrat të arrestuarve që janë: Erzen Breçani, ish-zv.drejtori i Policisë së Tiranës, Dedan Gjoni, Shefi i Krimeve në Komisariatin numër 6, Besmir Murati dhe Bujar (Ajazi) Germizi, emër i njohur i botës së krimit në Kukës.

Masë "detyrim paraqitje" Gjykata e Posaçme ka vendosur ndaj Jonida Babametos, oficere e Drejtorisë së Kufirit dhe Emigracionit.

Në kërkim janë: Ismail Zeneli, Artan Sulejmani, Albert Prenga, Bajram Germizi, Bajram Grabova dhe Ervin Mata.

Dyshohet se Ervin Mata dhe Eralbi Breçani ndodhen në vendet e Amerikës Latine, dhe akuzohen për trafik droge nga këto vende drejt Europës.

Ervin Mata dhe Erlabi Breçani kanë lidhje familjrare, pasi ky i fundit ka si partnere motrën e Matës.

Akuzat dhe rolet në grupin kriminal:

Ervin Mata, dyshohet se ndodhet jashtë vendit dhe akuzohet për grup të strukturuar kriminal, trafik narkotikësh dhe kryerje e veprimeve nga organizata kriminale. Ndërkohë Eraldi Breçani akuzohet për trafik ndërkombëtar droge.

Babai i tij, Erzen Breçani dyshohet se ka kryer veprën e pastrimit të parave dhe ka përkrahuar autorët e krimit. Dosja është ende në hetim.

Dedian Gjoni, shef i krimeve në Kombinat, i cili është nga Lezha dyshohet të ketë siguruar kushtet për të kryer një vrasje në bashkëpunim me grupin kriminal.

Veç prishjes së pazareve për ngarkesat e drogës, shkak i planeve për krime ishte dhe ajo e përplasjes dhe hasmërive midis Ervis Martinit dhe Ervin Matës.

Theksojmë këtu se në vitin 2018, tek ngjarja në ish-Bllok, Elvana Gjata është përdorur si karem mes dy emrave të njohur të botës së krimit.

Arrestimi i Breçanit dhe Dedan Gjonit

Mësohet se në momentin e arrestimit, mbrëmjen e 20 nëntorit, Breçani ka qenë bashkë me Dedan Gjonin, shef i Krimeve te komisariati Nr. 6 në Tiranë. Të dy janë arrestuar pranë stadiumit ‘Air Albania’, pasi kishin prerë bileta për të parë ndeshjen e Kombëtares me Ishujt Faroe./CNA