E fundit!

12:07 Opinione Ardi Stefa

Ndryshimi mund të presë edhe pak...

Paraqitja e fytyrave të reja në politikë është gjithmonë l...

Operacion ndërkombëtar antidrogë/ Arrestohen 27 persona, mes tyre 3 shqiptarë

19 Shkurt 2025, 11:15, Kronika CNA

Operacion ndërkombëtar antidrogë/ Arrestohen 27 persona, mes tyre

Policia e Shtetit në bashkëpunim me Interpol dhe autoritetet italiane kanë finalizuar operacionin ndërkombëtar “Alba Tibus”. Operacion i cili u krye për trafikim narkotikësh dhe goditje të grupit të strukturuar kriminal. Në kuadër të këtij operacioni janë arrestuar 3 shqiptarë të akuzuar për trafik kanabisi dhe pjesëmarrje në grup të strukturuar kriminal.

Në pranga kanë rënë A. A. 27 vjeç, K. D. alias K. Dh. 30 vjeç dhe Xh. H., 30 vjeç. Këta shtetas akuzohen se gjatë vitit 2019 kanë trafikuar në Itali lëndë narkotike.

Njoftimi i policisë

Policia e Shtetit

Finalizohet në Shqipëri dhe në Itali, operacioni ndërkombëtar i koduar “Alba Tibus”, për goditjen e një grupi të strukturuar kriminal për trafikim të lëndëve narkotike.

Operacioni në Shqipëri u finalizua nga Drejtoria për Hetimin e Krimit të Organizuar dhe Drejtoria e Forcës së Posaçme Operacionale në Departamentin Policisë Kriminale, në bashkëpunim me Drejtorinë Vendore të Policisë Vlorë, si dhe në koordinim me homologët italianë, me Zyrën e Interforcës Italiane në Shqipëri, Karabinierinë e Romës, Parioli, dhe me Drejtorinë e Interpolit.

Akuzohen për pjesëmarrje në një grup të strukturuar kriminal në Itali, për trafikim të Cannabisit, lokalizohen, kapen dhe vihen në pranga 3 shtetas shqiptarë.

Hetimet e përbashkëta identifikojnë dhe një tjetër pjesëtar të grupit, i cili aktualisht po vuan dënim në IEVP Rrogozhinë. Në kuadër të operacionit ndërkombëtar “Alba Tibus.Al”, u vunë në pranga shtetasit A. A., 27 vjeç, K. D. alias K. Dh., 30 vjeç dhe Xh. H., 30 vjeç. Ata dhe shtetasi E. L. që aktualisht po vuan një dënim në IEVP Rrogozhinë, akuzohen në kuadër të një procedimi penal të iniciuar nga Prokuroria e Romës, se në vitin 2019, të organizuar si grup i strukturuar kriminal, kanë trafikuar në Itali (kryesisht në Romë), lëndë narkotike Cannabis Sativa. Policia e Shtetit është e angazhuar dhe e vendosur për të vijuar bashkëpunimin me partnerët, për veprime të përbashkëta hetimore dhe operacionale, me qëllim goditjen e veprimtarive kriminale në fushën e krimit të organizuar dhe për kapjen e shtetasve të shpallur në kërkim ndërkombëtar.

Mediat italiane kanë nxjerrë të tjera detaje nga operacioni ndërkombëtar, ku gjithsej janë arrestuar 27 persona mes Italisë, Spanjës dhe Shqipërisë. Nga këta persona 20 janë në burg dhe 7 të tjerë në arrest shtëpie.

Si funksiononte organizata kriminale

Nga hetimet dhe finalizimi i operacionit u arrit të zbulohej një sistem i mirorganizuar. Droga, kryesisht marijuana, sipas asaj që raportojnë mediat fqinje, importohej nga Vlora. Falë një aleance me organizatat kriminale nigeriane, droga shpërndahej në të gjithë Italinë dhe vendet e tjera evropiane; trafiku përdorte një sistem transporti publik për të shpërndarë mallrat./ CNA