E fundit!

12:08 Aktualitet

Edhe një tjetër “pikëz e voçkël” mbushet me shtëpi

Analisti dhe gazetari Mentor Kikia ka reaguar pas zjarrit ...

Dritan Rexhepi kërkoi ta eliminonte/ Ish-prokurori: Si më kërcënoi me vdekje te dera e shtëpisë

17 Nëntor 2023, 08:52, Kronika CNA

Dritan Rexhepi

Ish-prokurori i Krimeve të Rënda, Eugen Beci, ka treguar se si Dritan Rexhepi e kërcënoi te dera e shtëpisë pasi e dënoi me 17 vite burg, nga të cilat kreu vetëm 2 vite.

I ftuar në emisionin "Të Paekspozuarit" me Ylli Rakipin, Beci tha se Rexhepi në vitin 2002-2003 kishte kryer dy tentativa vrasjeje në qytetin e Vlorës për të cilat ishte në kërkim.

Për këtë, shpjegon Beci, kishte kërkuar 17 vite burg, por që gjykata kishte dështuar ta dënonte dhe në momentin që doli nga burgu pati një problem nga ana hetimore dhe ai i kishte shkuar te dera e shtëpisë duke e kërcënuar se do ta eliminonte, por më pas u kap nga policia.

Beci theksoi se Rexhepi ishte një personazh kompleks për të cilin edhe atëherë edhe sot nuk është folur, që realizoi një grup të strukturuar dhe që investonte për të shpëtuar veten e tij dhe grupin kriminal.

Pjesë nga biseda me Rakipin

Ylli Rakipi: Avokat, ju e keni hetuar dhe madje jeni kërcënuar prej tij me vrasje. Përse e keni hetuar ju?

Eugen Beci: Ky person në vitin 2002-2003 kishte kryer dy tentativa vrasjeje në qytetin e Vlorës për të cilat ishte në kërkim. Në tentativën e parë, personi u plagos dhe shpëtoi. E shpallëm në kërkim. Nuk ishte zbuluar ende ngjarja e vitit 1999 se u zbulua me të dhëna dhe gjatë kohës që ishte në kërkim bëri një tjetër plagosje me tentivë vrasje dhe ne e arrestuam. Gjykata dhe sistemi dështuan ta dënonin. Unë kërkova 17 vite burg, ai u dënua vetëm 2 vite. Në momentin kur doli nga burgu pati një problem nga ana hetimore, por e parandaloi policia.

Ylli Rakipi: Nuk e kuptoj, ti thua 17 vjet dhe u dënua me 2 vjet.

Eugen Beci: Po prandaj erdhi te dera e shtëpisë ai.

Ylli Rakipi: Ç’do me thënë kjo punë? Të erdhi te dera ty?

Eugen Beci: Po. Mbasi mbaroi hetimin dhe gjykimin, 2 vjet, ishte i pakënaqur që prokuroria kërkoi 17 vjet dhe e pa se mund të kishte një mundësi që të dilte, siç doli, dhe për këtë arsye pati një tentativë për të realizuar një eliminim fizik ndaj meje. Nuk u realizua, u bë hetimi. U kap nga policia, nuk u provua tentativa ndaj organeve të drejtësisë. Por dua të them se ishte një personazh kompleks për të cilën edhe atëherë edhe sot nuk është folur, që realizoi një grup të strukturuar dhe që investonte për të shpëtuar veten e tij dhe grupin e tij kriminal./ CNA