E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Sllovenia gati të njohë shtetin e Palestinës

30 Maj 2024, 18:51, Kosova & Bota CNA

"Qeveria e Sllovenisë miratoi të enjten një vendim për njohjen e Palestinës si shtet të pavarur dhe sovran", deklaroi kryeministri Robert Golob gjatë një konference për shtyp. Ky veprim ndjek hapat e vendeve të tjera si Spanja, Irlanda dhe Norvegjia, dhe ka ngjallur reagime të ashpra nga Izraeli, shkruan Reuters.

Ministri i Jashtëm izraelit, Israel Katz, kritikoi vendimin duke thënë se shpërblen Hamasin për aktet e dhunës, duke iu referuar sulmit të 7 tetorit nga grupi islamik palestinez që çoi në konfliktin aktual në Gaza. Katz e konsideroi këtë si një shpërblim për "vrasje dhe përdhunim".

Në konferencën për shtyp në Lubjanë, Golob theksoi se njohja e Palestinës është pjesë e një përpjekjeje më të gjerë për të koordinuar presionin ndaj Izraelit për t'i dhënë fund konfliktit në Gaza. Ai bëri thirrje për ndërprerjen e menjëhershme të armiqësive dhe lirimin e të gjithë pengjeve.

"Ky është mesazhi i paqes," tha Golob, ndërsa qeveria ngriti flamurin palestinez përkrah atyre të Sllovenisë dhe BE-së përpara ndërtesës qeveritare në qendër të Lubjanës.

Vendimi i Sllovenisë vjen pas veprimeve të ngjashme nga Spanja, Irlanda dhe Norvegjia më 28 maj, që gjithashtu u kritikuan nga Izraeli.

Nga 27 anëtarët e BE-së, disa vende si Suedia, Qiproja, Hungaria, Republika Çeke, Polonia, Sllovakia, Rumania dhe Bullgaria kanë njohur tashmë shtetin palestinez. Malta mund ta bëjë këtë së shpejti.

Britania dhe Australia janë duke konsideruar njohjen, ndërsa Franca ka thënë se tani nuk është momenti i duhur. Gjermania dhe Shtetet e Bashkuara mbeten të përkushtuara ndaj një zgjidhjeje me dy shtete përmes dialogut, duke refuzuar qasjet e njëanshme.

Ndërkohë, parlamenti i Danimarkës votoi të martën për njohjen e shtetit palestinez. Norvegjia, e cila kryeson grupin ndërkombëtar të donatorëve për palestinezët, ka ndryshuar strategjinë e saj për të mbështetur njohjen e Palestinës./ CNA