web counter
LEXO PA REKLAMA!

SHKARKO APP

App Store
Google Play

E fundit!

x

Seancë pa opozitën për zgjedhjen e presidentit në Kosovë

28 Prill 2026, 07:51, Kosova & Bota CNA

Seancë pa opozitën për zgjedhjen e presidentit në

Seanca e jashtëzakonshme për zgjedhjen e presidentit në Kosovë pa praninë e opozitës, ka nxitur akuza për shkelje kushtetuese dhe rrezik për rendin demokratik. Reagimet politike dhe civile janë shtuar.

Kuvendi i Kosovës mbajti në orët e vona të ditës së hënë (27.04.) një seancë të jashtëzakonshme për zgjedhjen e presidentes/it të Kosovës, pa praninë e partive opozitare që bojkotuan seancën. Opozita tentimin e partisë në pushtet pa praninë e 80 deputetëve në sallë e cilësoi përmbysje të rendit kushtetues.

Partia në pushtet Vetëvendosja, propozoi dy kandidate të reja për postin e presidentes, Feride Rushiti nga shoqëria civile dhe Hatixhe Hoxha një ish-deputete e kuvendit. Kandidatja e parë Feride Rushiti mori 63 vota, nga 64 deputetë të pranishëm në sallë.

Kryetarja e kuvendit Albulena Haxhiu, ndonëse nuk e përmendi faktin që në sallë nuk ishin 80 deputetë, tha se seanca për zgjedhjen e presidentes vazhdon ditën e martë paradite.

Kuadri kushtetues për zgjedhjen e presidentit

Në vendimin e fundit të Gjykatës Kushtetuese thuhet qartë se Presidenti i Kosovës zgjidhet me dy të tretat e votavenë dy rundet e para të votimit, apo me 61 vota në rundin e tretë. Gjatë kohës sa mbahej seanca për zgjedhjen e presidentit vetëm me deputetët e Vetëvendosjes dhe pakicave jo serbe, pasuan reagime të shumta nga deputetë të partive opozitare, duke e cilësuar siç thonë "puç kushtetues”, mbajtjen e seancës për president pa praninë e dy të tretave nga 120 deputetë sa i ka parlamenti i Kosovës.

Opozita: "Shkelje e kushtetutës”

Kryetari i PDK-së Bedri Hamza, reagoi ashpër për nisjen e procesit të zgjedhjes së presidentit duke bërë thirrje që të ndërpritet ky proces. "Ajo çka ndodhi sonte është shkelje e kushtetutës. Pra procedura për zgjedhjen e presidentit nisi kundërkushtetuese. Kjo praktikë duhet të ndërpritet që të ruhet stabiliteti politik dhe institucional. Rreziku i kësaj situate është Vetëvendosja dhe z. Kurti, dhe nuk dëshiroj që vendi të zhytet në anarki”, tha Bedri Hamza.

Edhe kryetari i Lidhjes Demokratike të Kosovës, Lumir Abdixhiku, në reagimin e tij të parë tha se lëvizja Vetëvendosje me seancën për presidentin pa praninë e 80 deputetëve në sallë, "inicoi përmbysjen e rendit kushtetues dhe demokratik të Kosovës. Për sabotimin e kushtetutës partia në pushtet ka përgjegjësinë më të lartë dhe ata do ta mbajnë këtë përgjegjësi që tentuan dhe inicuan përmbysjen e rendit kushtetues”.

Reagimi i shoqërisë civile

Rrjeti i organizatave joqeveritare nga Instituti Demokratik i Kosovës (KDI), që vazhdimisht monitoron punën e kuvendit, dënoi ashpër siç thotë "përpjekjen për ta çuar përpara zgjedhjen e Presidentit pa përmbushjen e kuorumit të kërkuar kushtetues”, duke e cilësuar një veprim të tillë i cili "cenon drejtpërdrejt themelet e rendit kushtetues dhe funksionimin e demokracisë parlamentare në vend”.

"Vendimet dhe praktika e Gjykatës Kushtetuese kanë sqaruar qartë standardin që duhet ndjekur, sipas së cilit përcaktohet që procedura e zgjedhjes së Presidentit kërkon pjesëmarrjen e së paku dy të tretave të të gjithë deputetëve në raundin e parë dhe të dytë të votimit, ndërsa vetëm pas përmbushjes së këtij kushti procedura vazhdon në raundin e tretë”, thuhet në reagimin e KDI-së.

Prandaj, organizatat e shoqërisë civile u bëjnë thirrje "deputetëve që të respektojnë standardet kushtetuese dhe të shmangin veprime që thellojnë krizën institucionale”./ DW





Lajmet e fundit nga